I-IEC ITHI KAYIQONDILE UKUGXAMBUKELA KWIPOLITIKI

IKHOMISHINI yokhetho i-electoral Commission of South Africa (IEC), ithi kayiqondile ukugxambukela kwipolitiki ngokuphonsela inselelo isinqumo senkantolo yezokhetho, i-electoral Court, mayelana nesimangalo esivune umkhonto wesizwe Party (MK Party).

Ngolwesihlanu I-IEC imemezele ukuthi isedlulisela enkantolo yezomthethosisekelo isinqumo seelectoral Court, sokuguqula isinqumo sayo I-IEC sokuchitha ukuphakanyiswa kwegama lowayengumengameli wezwe umnu Jacob Zuma (osesithombeni) emagameni alabo abazongena ezikhundleni ephalamende likazwelonke nasezishayamthetho ezifundazweni.

I-IEC yachitha igama likazuma ngomthetho okwisigaba 47 (1) (e) somthethosisekelo.

Lesi sigaba sithi noma ngubani oke watholwa enecala, wagwetshwa isikhathi esingaphezulu kwezinyanga eziwu-12 ejele ngaphandle kokunikezwa ithuba lokuhlawuliswa imali, akavumelekile ukungenela ukhetho futhi abe yilungu lephalamende.

I-IEC ithi ifuna ukuba inkantolo yomthethosisekelo icacise ngencazelo nokuhunyushwa okuyikhona kwalesi sigaba esiwu-47 (1) (e) somthethosisekelo.

Ithi ukucaciswa kwaso kuzosiza kulolu daba okubhekenwe nalo njengamanje, futhi kusize ngisho nasokhethweni oluzayo.

I-IEC iqhube yathi inhloso yayo ngokuphonsela inselelo isinqumo se-electoral Court, wukuqinisekisa

ukhetho olukhululekile, nolungavuni hlangothi. Ihlose nokuthi kucace ngemithetho eqondene nezokhetho nokuthi isetshenziswa ngokulinganayo.

Iqhube yathi ifisa ukuba isinqumo senkantolo yezomthethosisekelo sikhishwe ngaphambi kosuku lokhetho. Njengoba I-IEC icacisa ukuthi kayihlosile ukuzibandakanya kwezepolitiki, uzuma useke wakhuluma esidlangaleni, eyisola ngokuthi igxambukela kwipolitiki, wathi akufanele kube njalo kodwa okwayo wukubhekana ngqo nomsebenzi wokhetho, ingangeni kwipolitiki.