Ubonga ithuba lesibili owaduma kwichiefs osenohlelo kwitv
UBONGA ithuba lesibili empilweni owayengumdlali wekaizer Chiefs ujunior Khanye, ozoba nohlelo lwempilo yakhe kumabonakude esiteshini esingaphansi kwem-net, imzansi Wethu.
Ukhanye owayengomunye wabadlali baleli qembu elikhulu eningizimu Afrika, waba nedumela ngendlela ayenekhono ngayo lokudlula kwabanye abadlali, kujabule abalandeli.
Ngeshwa ukudlala kwakhe ibhola elikhokhelwayo kakuthathanga isikhathi eside, wagcina esephenduke umgodi onganukwanja emaqenjini ayewadlalela ngenxa yendlela ayeziphatha ngayo ngaphandle kwenkundla. Lo mdlali wasolwa ngokuzifela ngobumnandi nangokucwila ezinkanjini zikafaro okwakugcina sekumenza angayi ukuyozilolonga.
Uke wadlalela amaqembu okubalwa kuwo neplatinum Stars, imaritzburg United, i-united FC nemalati Chiefs yaseswazini. Uke wadlalela namaqembu esizwe okubalwa elika-under 20, Under 23 nebafana Bafana.
Ekhuluma NELANGA uthe, ubonga umdali ngokuthola ithuba lesibili empilweni. “Okwenzeka empilweni yami kungumusa kankulunkulu namadlozi akithi ngoba baningi abadlali engidlale nabo abebeyizintandokazi, kodwa abasheshe badlula emhlabeni bengakaqedi ukudlala ibhola,” kusho yena ebala abadlali abafana no-emmanuel “Scara” Ngobese nogift Leremi ababeyizibabuli enkundleni ngezikhathi zabo.
“Abanye base bezitshela ukuthi sekuphelile ngami ngesikhathi ngisephansi kodwa ngenxa kankulunkulu, ngikhona, namhlanje sengizoba nohlelo olukhuluma ngempilo yami kumabonakude,” kusho yena.
Uthi uhlelo luzobizwa ngokuthi Fixing The Game, luzoba yisifundo nakulabo abasakhula.
Uthe nakuba engazimisele ukudalula konke okuzovela kulolu hlelo, kodwa luzogxila kunobhutshuzwayo nangempilo jikelele. Uthe kuzovela nomqhudelwano wakhe azimisele ukuvundulula ngawo ithalente kuwona, ozohlanganisa amaqembu adumile asemalokishini asegoli.
Ukhanye muva nje unokubonakala kwidiski TV, lapho ehlaziya khona unobhutshuzwayo. Uke wabonakala elingisa nasemdlalweni kamabonakude ivula Vala. Mayelana nokulingisa, uthe ubonga umandla N ngokubona ithalente kuyena nakuba yena wayengakaze azicabange elingisa.
Uthi kunefilimu ezokhonjiswa kwinetflix azobonakala kuyona ayiqophe ngozibandlela (December).
Uveze nokuthi unengoma enesigqi samapiyano anayo esihloko sithi, Obrigado apike kuyona UDJ Muzi nombali. Lolu hlelo kulindeleke ukuthi luqale ngontulikazi (July) nonyaka. lucky.cain@ilanganews.co.za