INTSHA IKHUTHAZWE UKUNGENA KWEZOLIMO
IGQUGQUZELE intsha ukukhuthalela ukusebenzisa umhlabathi ukuze ikwazi ukuziphilisa imeya kumasipala umshwathi, umnu Mandla Zondi.
Lokhu ikusho ngesikhathi yethula usomqulu wentuthuko edidiyelwe nesabelomali sika-2024/25. Lo mhlangano ubusenkundleni yemidlalo emajele, emathulini, e-appelsbosch.
Ikhale kakhulu ngokuthi umasipala wabo muncane futhi kawukwazi ukuqoqa imali etheni okugcina kubaphoqa ukuthi bathathe nasemalini abasuke beyibekile ukunezela ngayo ekuqinisekiseni ukuthi baba nezinhlelo eziningi abazenzayo onyakeni.
Ngaphambi kokuba yethule inkulumo, kuqale kwaba nesikhathi sokukhumbula asebedlulile emhlabeni njengoba uzondi ethi zonke izimeya ezazingaphambi kwakhe, kazisekho, sezalala kobandayo, kanti ngonyaka odlule kuphinde kwanamakhansela adlula emhlabeni abesebenza ngaphansi kwalo masipala.
“Imali esikwazi ukuyiqoqa kubakhokhi bentela ilinganiselwa ku-r57 million, okuyiyo esihlukanisa kuyona, siyabele izinhlelo esisuke sizozenza emawadini.
“Kulokhu, kuphoqeleke ukuthi sithathe nemali elinganiselwa ku-r50 million ukuze sikwazi ukwenza amaphrojekthi esihlele ukuwenza ngempumelelo,” esho.
Uzondi ubalule nezinhlelo zokwakhiwa kwemigwaqo, ikakhulukazi ku-ward 11, lapho kuzokwakhiwa ozodla u-r15.1 million. Ku-ward 8 kuzokwakhiwa umgwaqo ka-r2.7 million.
Uveze nokuthi yize bewumasipala omncane, kodwa banezinhlelo zokuthenga imishini yokulungisa imigwaqo ngoba lokho kuzobenzela imali.
Uphinde wethula nezinhlelo abazihlelele intsha, wayikhuthaza ukuthi igxile nakwezolimo, wathi kunemali elinganiselwa ku-r4 million yezinhlelo ezahlukene.
“Indawo esiyakhele ivunde kakhulu, ngakho-ke ngiyanicela bantu abasha ukuba nikukhuthalele ukusebenzisa umhlabathi. Uma kukhona lapho enidinga khona usizo, likhona ihhovisi elizonilekelela,” kusho uzondi.
Ukhuthaze nabazali ukuthi baqinisekise ukuthi uma benabantwana abanethalente, basheshe baleseke. Lokhu ukusho ngemuva kokusina kudedelana intsha yasendaweni.
Phakathi kwezikhalo nezidingo eziphakanyiswe ngamalungu omphakathi, wukungabinawo amanzi kwezinye izindawo, nemigwaqo okungahambeki kahle kuyona uma kune imvula.
Imeya kumasipala wesifunda umgungundlovu, umnu Mzi Zuma, nayo yethule izinhlelo ezahlukene zamanzi abazozenza ngaphansi kwalo masipala ukulwisana nezikhalo zemiphakathi eyahlukene engakabi nawo amanzi. nonhlakaniphos@ilanganews.co.za