UKUQOQA UDOTI KUHLOMULISE ISIKOLE NGOKWAKHELWA INDAWO YOKUDLALA
UTHISHANHLOKO wasemthethweni Primary School, kwa-p, emlazi, umnu Sibusiso Makhoba, uveze ukukhathazeka kwakhe ngokushoda kwezinkundla zokudlala abantwana.
Umakhoba ukusho lokhu ngesikhathi amukela indawo yokudlala abantwana abayakhelwe ngabakwasasko. Lesi sikole sakhelwe le ndawo ngemuva kokuziqwaqwada zonke eziwu-10 zasemlazi ngokuqoqwa koplastiki asebesebenzile bezinkwa zakwasasko.
Lesi sikole siqala kwagrade R kuze kufike kugrade 7. Le ndawo yokudlala yenzelwe ikakhulukazi abafundi bakwagrade R.
“Ngijabule kakhulu ngokuthi siyisikole sikwazile ukuzishaya zonke izikole zasemlazi ebeziyingxenye yalo mncintiswano.
“Okungijabulisa kakhulu wukuthi izingane sezizothola ithuba lokudlala ngoba le ndawo esikuyona kayinazo izindawo zokudlala izingane. Ngibonga kothisha nabazali ngokubambisana kulolu hlelo.
“Opulastiki bayinkinga enkulu emhlabeni wonke uma bengaqoqwa. Badala ukungcola okungalawuleki. Le ndawo yokudlala izosiza ukugcina izingane zinomdlandla, zikwazi nokusizana ngesikhathi zidlala. Izinkundla zokudlala zibaluleke kakhulu ezinganeni.
“Nginethemba lokuthi abakwasasko bazophinde babuye bezosipha okunye. Engifuna bahambe bekwazi wukuthi sizoqhubeka sibaqoqe oplastiki babo ukugcina indawo yethu ihlanzekile,” kusho umakhoba.
Uphethe ngokuthi ngesikhathi sokudlala, kuzokuba nothisha ozogada izingane ukuqinisekisa ukuthi akekho olimalayo.
Abakwasasko bebephathele abafundi izinto ezahlukene zokudlala, umfundi ngamunye ugoduke nesinkwa, nabebengekho babekeliwe.
Umthokozisi Dlamini oyisales and Distribution Manager kwasasko, ubongele isikole ngokusebenza ngokuzikhandla.
“Njengoba zingasekho izindawo zokudlala, izingane zigcina zihlukumezana zodwa ngoba kayikho into eziyenzayo ngesikhathi sazo sokudlala. Uma izingane zidlala, siyancipha isibalo sokuhlukumezeka,” kusho udlamini.
Uphethe ngokuthi lolu hlelo lokubuyisa opulastiki inkampani yabo ilwenza iningizimu Afrika yonke. Uthi inhloso yalo wukuqinisekisa ukuthi indawo ehlala umphakathi ihlanzekile.