‘Abangasekho kasibakhonzi, siyabakhumbula’ kusho umbhishobhi
Ozifela ngepirates uchazwe wukufika kwengwazi yale kilabhu kwembulwa itshe likanina
UMBHISHOBHI wezion Congregational Church of South Africa, okuyibandla elidume ngamacongo, umbongiseni Sokhabase, uveze ukuthi kabayexwayi imicimbi ethinta abantu abangasekho.
Umbhishobhi Sokhabase ubekhuluma NELANGA Lempelasonto ngesikhathi eyokwembula itshe lesikhumbuzo likanina kavusumuzi “Msobho” Sithole - ongomunye wabalandeli bokuqina be-orlando Pirates esanda kujabulisa abalandeli bayo ibhaxabula kabuhlungu ilamontville Golden Arrows ngo-7-1 kowedstv Premiership, okuyinto engajwayelekile kulesi sigaba.
Inkonzo yokuvulwa kwetshe likanina kamsobho beyenzelwe embangweni, ematimatolo, muva nje lapho bekugcwele khona abalandeli bezimnyama abebephuma emazikweni ehlukene, kubalwa nenkakha yale kilabhu, utlo Segolela owazakhela udumo eyingxenye yepirates eyanqoba i-treble amasizini amabili elandelana ngo2010/11 nango-2011/12.
Umbhishobhi Sokhabase uthe: “Inkolo yethu kayibexwayi abantu abangasekho. Ungaphila kanjani nomuntu bese uyamexwaya uma engasekho emhlabeni?
“Siyibandla, kasibakhonzi abantu abangasekho, kodwa siyabakhumbula. Itshe lenzelwa izizukulwane ukuba zazi ukuthi uninakhulu wazo owayephila kulo mhlaba walondolozwa kuphi. Nezwi lenkosi liyakufakazela lokho.
“Izwi esiyaye silivule emicimbini ofuze lona ngabokuqala kwabasethesalonika isahluko 4, evesini 13 kuya ku-18. Lo mbhalo ufundeka kanje: ‘Kepha kasithandi bazalwane ukuba ningabi nakwazi ngabalalayo, ukuze ningadabuki njengabanye abangenalo ithemba.
‘Ngokuba uma sikholwa ukuthi ujesu wafa, wavuka, ngokunjalo-ke unkulunkulu uyakubaletha nabaleleyo kujesu kanye naye. Ngokuba lokho sikusho kini ngezwi lenkosi ukuthi thina, enisekhona nisasele kuze kube sekufikeni kwenkosi, asiyikubandulela nempela abaleleyo, ngokuba inkosi uqobo iyakwehla ezulwini ngezwi lenhlokomo, ngephimbo lengelosi enkulu nangecilongo likankulunkulu, nabafileyo kukhrestu bayakuvuka kuqala, khona thina, esisekhona sisasele siyakuhlwithwa kanye nabo emafwini, sihlangabeze inkosi emoyeni; kanjalo-ke siyakuba nayo inkosi
njalo. Ngakho-ke duduzanani ngalawo mazwi’. Lo mbhalo ukubeka kucace ngabangasekho.”
Umsobho - okhonza ngaphansi kukambhishobhi Sokhabase, ngesikhathi esekhuluma naleli phephandaba uthe: “Nami njengomuntu okholwayo ngiyabakhumbula abantu abangasekho, kangibakhonzi. Nami bengikhumbula umama wami, intokazi yakwazondi, umargaret.
“Kawukwazi ukukhohlwa ngabantu okhule nabo. Nojesu
uyasho ukuthi mina ngingubaba, ubaba ukimi. Kumanje siphuma ephasikeni lapho besikhumbula khona inkosi yethu ujesu Khrestu nayo eyadlula ethuneni. Ngakho-ke abantu abafile siyabakhumbula.”
Umsobho uthe ujabule ukubona abalandeli bezimnyama befika ngobuningi, bephuma emazikweni ehlukene. Ubonge nosegolela ngokunyathela emzini wakhe, nezivakashi ezidumile kwakhe ezimenze wamkhulu.