UMANGAZWA YINDAWO AYIDLALAYO KUZALO
LINDA XIMBA
UMANGAZWA yindlela angene ngayo endaweni ayilingisayo kwangathi uyinkunzimalanga yesigebengu umlingisi ovamise ukubonakala edlala izindawo zabantu abahloniphekile emphakathini.
Isematheni indawo edlalwa ngubongani Mbatha kuzalo, lapho elingisa khona ukhumbulani, ophila impilo yobugebengu.
Ungungqongqondo wokushadisa abokufika basepakistan namantombazane akuleli ukuze bathole ubuzwe baseningizimu Afrika.
Uphinde avele eshushumbisa (trafficking) amantombazane aselokishini angasebenzi, afuna ukuzitholela imali esheshayo.
“Okuqondwe ngababhali bozalo ngale ndawo enginikwe yona, wukukhombisa ukuthi bakhona abantu abadlala ngezingane ezingasebenzi, bazisebenzise ukusiza abokufika ukuze bahlale ntofontofo ezweni.
“Amanye amantombazane akhohliswa ngemali ayinikwa njalo ngenyanga okuzohamba isikhathi iwafake enkingeni uma sekumele athole isibonelelo,” kuchaza umbatha.
Lo mlingisi wakwamashu, ophinde aqondise futhi adidiyele imidlalo yeshashalazi, utshele ILANGA Lempelasonto ukuthi imethusile indlela abantu asebembuka ngayo ngokudlala le ndawo.
Uthi abanye bathi kayimfanele, kwazise akavamisile ukubonakala edlala izindawo zabantu abayizixhwanguxhwangu.
“Ngisanda kuhlangana nomunye umama ethi mangibuyisele uminenhle ingane yakhe ngoba le nto engiyenzile kayilungile.
“Lokho kungitshengisile ukuthi indawo engidlaliswe yona iyakwazi ukuthumela umyalezo abantu, bacabange ukuthi kunomkhuba omubi ngempela engiwugilile.”
Uthe ngesikhathi enikwa le ndawo, wakhumbula amazwi enkakha yomlingisi esashona uramolao Makhene, amchaze njengothisha wakhe, owathi uma ungumlingisi kumele ufane noplastiki.
“Wathi uplastiki uma uwufaka amanzi, kunendlela ozoma ngayo. Kanjalo noma uwufaka amatshe noma inhlabathi, kunendlela ethile ozoma ngayo, okuchaza ukuthi kumele ukulindele ukushintsha noma kunini uma kunesimo esikuphoqayo.”
Ubongani uke wabonakala emdlalweni unikiwe ku-e.tv, edlala indawo kadlamini.
Useke wavela nakwihostela nakwidurban Gen kanti emidlaweni yeshashalazi, uke wadlala kwi-all Gone! imaluju Zulu, iskungpoomery, ispice n Stuff, ingicela Uxolo, isophiatown, isweetie Darlin, ibiggly Yuge, imissing, ihitman, Impi Yabomdabu Isethunjini, neminye.
Uthe umatasa nozakwabo wakhe ubhekani Shabalala, bapholisha umdlalo wase-siteji, izemqadini, ozokhonjiswa izinsuku ezimbili eplayhouse, ethe Fringe, ngenyanga ezayo.
Uthe lo mdlalo uzokhonjiswa nakwinational Arts Festival emakhanda, e-eastern Cape.
Umbatha uthi izemqadini, edlalwa nguye noshabalala kuphela, iveza izibazi ezasala kubantu abahlukunyezwa yizimpi zepolitiki nezezigodi ogwini, ngaphambi kokuba elakuleli lithole inkululeko.