Kwexwayiswa ngobugebengu bokuthunjwa kwabantu
'Bathatha umakhalekhukhwini wami, bayikhipha yonke imali enganginayo'
PHUMLANI GAMA
SEZIYINSAKAVUKELA umchilo wesidwaba izigameko zokuthunjwa kwabantu ezindaweni ezakhele itheku namaphethelo. Kubikwa ukuthi lo mkhuba udla lubi ezindaweni ezifana nezinxanxathela zezitolo (malls), lapho okupakwa khona izimoto.
Kubikwa ukuthi ezindaweni eziningi izinswelaboya zigadla kakhulu kosomabhizinisi nabafundi okwaziwayo ukuthi bazalwa emindenini yabadla izambane likapondo.
Leli phephandaba lithole ukuthi iningi lezigameko lenziwa yizigilamkhuba ezizenza onogada abaqashelwe ukuqapha izimoto uma abanikazi besangene ezitolo.
Kuvela ukuthi iningi lezisulu lidunwa izimoto ngesikhathi selilungiselela ukubuyela emuva emakhaya.
Kuvela ukuthi imvamisa izinswelaboya ziyaye zibheke kakhulu izimoto ezibizayo ngoba zinenkolelo yokuthi abanikazi bazo banemali.
Ezinye zezisulu zithathwa nezimoto zazo, zithunjwe, maqede kufunwe imali ezihlotsheni zazo.
ZIYAPHAWULA IZISULU
Owesilisa wasenanda, ethekwini, ulandise ILANGA ngokwamehlela ngenyanga kalwezi (November) nyakenye.
Ukhulume naleli phephandaba ngaphansi kombandela wokuba kugodlwe imininingwane yakhe, ngoba enovalo lokuthi izigebengu zisengabuya zizomhlukumeza futhi. Uthi iningi kakhulu imali eyatholwa ngababemthumbile.
“Ngangiphuma esitolo ngiphethe nje izimpahla ezincane, ngiya lapho engangipake khona imoto.
“Kwathi uma ngifika, ngathola abesilisa ababili ababezenza abantu abagade izimoto.
“Kwaqhamuka owesithathu owafika wabajoyina babe sebesondela ngasemotweni yami.
“Kwathi uma ngivula izicabha zemoto, ababili baveza imibhobho yezibhamu, bangiyalela ukuba ukhiye ngiwunike lo owayengasiphethe isibhamu. Laba ababili bahlala nami ezihlalweni zangemuva emotweni.
“Bathatha umakhalekhukhwini wami maqede bayikhipha yonke imali enganginayo. Babengishaya kabuhlungu.
“Okwalandela lapho bangiyalela ukuba ngixhumane namalungu omndeni wami ukuze ngicele usizo lwemali, ngoba kayenele le ababeyithole kimi.
“Ingaphezulu kuka-r200 000 imali abayithola ngalolo suku,
Lempelasonto
sekuhlangene nemali eyayikade ifakwa ngamalungu omndeni nezihlobo zami.
“Namanje ngizwa ubuhlungu uma ngicabanga ngalesi sigameko.
“Laba bantu bahlala nami amahora angaphezulu kweshumi,” esho.
AMAPHOYISA ANGAZIDLULI IZIMOTO EZIPAKE EMGWAQWENI
Uthi ubonga ukuthi izigebengu kaziyithathanga imoto yakhe.
“Bangidedela sekuthanda bona, nayo imoto yami, banginika konke nokhiye.
“Ngemuva kokuba sengehlelwe yilesi sigameko, ngabika udaba emaphoyiseni.
“Okuzwisa ubuhlungu wukuthi laba bantu baqala ukungihlukumeza sisendaweni okwakulokhu kudlula kuyona abantu, bona bezitshela ukuthi sizihlalele kanti mina ngiyashaywa ngaphakathi, ngigadwe nangezibhamu.
“Uma ngiyobika udaba, ngaqala lapho ukuzwa ukuthi lona wumkhuba osekunesikhathi eside ukhona.
“Kwathiwa abikwa njalo
amacala okuthunjwa kwabantu maqede kuyalelwe imindeni yabo ukuba ifake imali ukuze bezodedelwa.
“Ngithanda ukwexwayisa amaphoyisa nabezinhlaka zezokuphepha ukuthi akulungile ukuvele badlule nje imoto uma ipakwe eduze komgwaqo, ngoba ngenkathi kwenzeka kimi lokho, yadlula iveni yamaphoyisa, kodwa kayimanga. Ngikholwa wukuthi amaphoyisa ayephakathi evenini ayezitshela ukuthi singabantu abazihlalele nje.”
LENYUKILE IZINGA LOKUTHUNJWA KWABANTU
Ngokombiko wamaphoyisa kuleli, lenyuke ngo-85% izinga lokuthunjwa kwabantu ngenhloso yokubagebenga imali kuma-akhawunti abo, kusentshenziswa ama-app asemabhange.
Leli phephandaba lithole ukuthi lo mkhuba usungenise nasezindaweni ezisemakhaya.
Esinye sezigameko senzeke ngenyanga edlule Kwamondi, eshowe, kwesinye sezikole.
Kubikwa ukuthi bekuwusuku lokuhola kothisha kulesi sikole.
Ikhansela lendawo umnu Nsakansaka Ngema, litshele leli phephandaba ukuthi ngokombiko abawutholile, kugasele abesilisa abebebukeka besebancane ngokweminyaka.
“Kuthiwa kufike abafana abancane, behlome ngezibhamu.
“Kuthiwa baqale ngokubamba unogada wesikole, bamvalela ehhovisi likathishanhloko, kanye naye uthishanhloko.
“Bebebiza uthisha ngamunye, bafike bamyalele ukuba adlulisele kwi-akhawunti yabo (transfer) yonke imali ayiholile. Bazama nokuthatha imoto yomunye wothisha kodwa bangaphumelela, bagcina sebeyishiya.
“Ishowe isiphenduke ikhaya lezigilamkhuba ezihlalise lubhojozi umphakathi - kugqekezwa imizi yabantu, kubanjwa inkunzi kuhlonyiwe.
“Kuningi okunga-lungile okwenzekayo lapha endaweni ngenxa yokwanda kokusentshenziswa budlabha kwezida-kamizwa,” kusho ungema.
Okhulumela amaphoyisa kamasipala itheku, ucol uboysie Zungu, naye uthe zandile izigameko zokubanjwa kwenkunzi, ikakhulu ema-mall.
“Amaphoyisa ethu ayaye abikelwe ngezigameko zokubanjwa kwenkunzi ezindaweni okupakwa kuzona izimoto kodwa esikhathini esiningi thina sigcina ngokuthi singenelele.
“Lona wumkhakha wophiko ISAPS nezinhlaka zonogada eziyaye ziqashwe ngabaphethe izinxanxathela zezitolo, futhi okuyibona okufanele baqinisekise ukuthi amakhasimende angena futhi aphume ephephile,” kusho uzungu.
Okhulumela amaphoyisa Kwazulu-natal ult-colonel Robert Netshiunda uthe basebenza ngokuzikhandla ngenhloso yokuqeda lesi sihlava.
“Siyenyuka isibalo sabantu ababoshwayo usuku nosuku. Sinxusa umphakathi ukuba uhlale ngokuqaphela ngaso sonke isikhathi.
“Uma kukhona okubonayo, okusolisayo, unganqeni ukuthinta amaphoyisa,” kusho unetshiunda.
INKAMPANI YONOGADA
Isikhulu esiphezulu senkampani yonogada ifidelity, umnu Wahl Bartman, sithi kunezinto ezingenziwa ngamalungu omphakathi ukuze ezohlala ephephile.
– Gwema ukuveza izinto ezibizayo ezifana nobucwebe esidlangaleni, ngoba lokho kungakudonsela izigilamkhuba.
– Bika kosondelene nabo uma kuzokwenzeka ushintshe umzila noma indlela ojwayele ukuhamba kuyona.
Uma ikhona indlela, makube khona othile womndeni ozokwazi ukuxhumana naye uma ungena emotweni njengokuthi abheke isiqophamkhondo (tracker) lapho uhamba khona ngemoto.
– Vikela umuzi wakho ngocingo olunogesi, ufake namakhamera uma amandla ekhona.
– Uma esenxanxatheleni yezitolo, gwema ukukhuluma nabantu ongabazi.
– Qaphela izimoto nabantu abaseduze kwakho uma uphuma noma usubuyela ekhaya, kusho ubartman. phumlani@ilanganews.co.za www.ilanganews.co.za