'Imicimbi kazulu mayenganyelwe yindlunkulu, hhayi uhulumeni'
Umdlokombane wakuzwakalisa ukungenami ngalesi sihlava
ISIZWE samazulu saziwa futhi sihlonishwa emhlabeni jikelele. Siphinde silinganiswe nendlunkulu yamangisi ngesithunzi ngokunjalo nezimpawu ezingaconsi phansi ezifana nococa Cola, ‘Toyota’, ‘FIFA’ nezinye.
“Ngabe use-iceland, erussia, ebrazil, e-india, kwelamajalimane noma kwelamangisi, wonke umuntu ohlangana naye uyasazi noma wake wezwa ngesizwe samazulu ngokunjalo nomlando namaqhawe kazulu,” kwasho owayengundunankulu wakwazulu-natal umnu Sbu Ndebele.
Kufanele ngabe siphatha ingcebo yomlando kazulu njengeqhinga nethuba lokugubha nokukhuthaza ukuthanda izwe nobunye kubantu bakuleli nokwakha umnotho wesifundazwe ngokugqugquzela ezokuvakasha.
Kepha okwenzeke muva nje ngesikhathi uzulu ekhumbula isilo udinuzulu, kushiye umbuzo ngokufanele ukuba umelusi nomphathi wesiko, amagugu nemicimbi kazulu phakathi kwendlunkulu nohulumeni?
Ngokomlando kazulu, isilo, indlunkulu kazulu nobuholi bendabuko bangabelusi bomhlaba, bengcebo, besiko, bamagugu nemicimbi yesizwe. Pho kungani isilo, indlunkulu nobuholi bendabuko bengazibambeli mathupha ekuphathweni kwamagugu esizwe?
Lo mcabango ungifikele emuva kokubona ihlazo elenzeke emkhosini wokugubha isilo udinuzulu phambi kwesilo umisuzulu nendlunkulu, umengameli wezwe, amakhosi, izicukuthwane nozulu wonkana. Ngiye ngakhumbula izimvo nemizwa isilo uzwelithini kabhekuzulu ayizwakalisa esadla anhlamvana ngokuhlonishwa kwesiko lesizulu wuhulumeni nokunganyelwa kwemicimbi yesizwe.
Ngesikhathi evula isishayamthetho sakwazulu-natal ngo2006, umdlokombane wazwakalisa ukungenami ngokwehluleka kukahulumeni ukuhlonipha isilo, indlunkulu, nezinhlaka zobuholi bendabuko njengobuholi obusophondweni lokubuswa kwesifundazwe. “Kuyishwa ukuthi nakulesi sikhathi senkululeko, izinsika zombuso kazulu, okuyindlunkulu, izinhlaka zobuholi bomdabu nengonyama Trust sekudluliselwe kubaholi bepolitiki, osekushiye lobu buholi buyizichuse nezibukeli.
“Amakhosi ngabaholi abakhonjwa ngumdali futhi abajutshwe ukuba sekhaleni lokuvikela nokuphathwa kwengcebo namagugu kazulu,” kusho umdlokombane.
Ngosuku lokugubha amagugu esizwe ngomandulo (September) ngo2015, umdlokombane wazwakalisa ukungenami ngokuphathwa, ngokuhlelwa nokudidiyelwa kwemicimbi yesizwe samazulu wuhulumeni. “Imicimbi yesizwe samazulu kufanele ukuthi yenganyelwe yindlunkulu nomkhandlu wesizwe ukuze iqhubeke nokuba yinqolobane yokugcina isiko, umlando nengcebo kazulu nokuba yisizinda sokubumbana kwesizwe futhi ivikelwe kosopolitiki nosomabhizinisi abahlose ukuyisebenzisa ukuze bafeze izidingo zabo,” kusho isilo.
Okwenzeke emkhosini wokugubha isilo udinuzulu kufakazele okwashiwo yisilo uzwelithini. Sekuyisikhathi manje lapho isilo, indlunkulu nobuholi bendabuko kufanele bazibambele ekuphathweni komhlaba, amagugu nemicimbi yesizwe ukuze ingezoqhwagwa ngosopolitiki nosomabhizinisi ukufeza izinhloso zabo.
Ngesikhathi sikahulumeni wobandlululo, amasiko namagugu abamnyama ayecindezelwe futhi ecekelwa phansi ukuze kudlondlobale isiko lezifikanamthwalo. Imiphakathi yayincishwa izinsiza namathuba okuphatha, okuthuthukisa noma okugcina amagugu ayo ngokuzimela ukuze ihlale ikhangeza kuhulumeni nosopolitiki.
Imicimbi kazulu efana nemikhosi yokugubha isilo udinuzulu, isilo ushaka, impi yasesandlwana, isivuno samaganu, umhlanga wezintombi neminye kufanele ukuthi yenganyelwe, iphathwe futhi ihlelwe yindlunkulu.
Ngokwengonyama Trust Act, ingonyama Trust kufanele ibe namandla okulawula nokuziphathela konke okungamagugu esizwe samazulu. Uhulumeni kufanele ubuyisele kwitrust wonke amandla okuphatha umhlaba, ingcebo namafa kazulu. Ukuphathwa kwemicimbi yesizwe kufanele ngabe kwenziwa yingonyama Trust.
Izimpawu okufanele ukuthi zikhangiswe emicimbini yesizwe kufanele kube wumfanekiso wesilo njengobuso besizwe, indlunkulu kazulu nobuholi bendabuko, hhayi uhulumeni.
Iqhaza likahulumeni kufanele kube wukukhangisa nasekwaziseni ngale micimbi ezimakethe zakuleli nasemhlabeni ilekelele ukuheha izivakashi. Osopolitiki kufanele babe yingxenye yale micimbi njengezimenywa zesilo nendlunkulu. Ngokuhlabahlosa kwamagugu nemicimbi yakwazulu, isizwe sisethubeni elihle lokuba yisizinda sezivakashi somhlaba jikelele.
•