Makwenziwe isibonelo ngabazixebulela umkhoma emalini yabakhokhi bentela
IZINSOLO zenkohlakalo ezijwayele ukugubuzela isikhwama sikahulumeni sokusiza abafundi abafunda ezikhungweni zemfundo ephakeme, inational Student Financial Aid Scheme (NSFAS), zenza umuntu azibuze ukuthi, engabe kwakhala nyonini ezikhulwini zikahulumeni eziphathiswa inkece yomphakathi. Sikusho lokhu ngoba cishe zonke izinhlaka zombuso ezengamela noma ezaba imali yabakhokhi bentela, zijwayele ukulandelwa yiphunga lenkohlakalo. Ukukha nje phezulu, singabala lapha i-unemployment Insurance Fund nenational Lotteries Commission (NLC).
Izikhulu ZENLC nababengamalungu ebhodi yabaqondisi bayo, bakhonjwa indlela eminyakeni edlule, emuva kokutholakala kokuthi babexebula umkhoma kule nhlangano, omsebenzi wayo kuwukuxhasa ngenkece izinhlaka zomphakathi.
Uma sibuyela KWINSFAS, ngolwesine ungqongqoshe wemfundo ephakeme udkt Bonginkosi Nzimande uhlakaze ibhodi labaqondisi balesi sikhwama wasifaka ngaphansi komlawuli. Ukwenze lokhu emuva kokuba ngalo ulwesine, usihlalo webhodi LENSFAS umnu Ernest Khosa, obekade emisiwe emsebenzini ngenxa yezinsolo zenkohlakalo, esulile kulesi sikhundla.
Kulindeleke ukuba unzimande achazele izwe esigcawini sabezindaba ngesonto (kusasa), ukuthi kungani ethathe isinyathelo sokuxosha abaqondisi. Noma engakachazi umphephethe, sekuwumlando ukuthi lesi sikhwama, njalo ngonyaka esabelwa amabhiliyoni amarandi emali yomphakathi, selokhu sasungulwa silandelwa yiphunga lenkohlakalo nokungaphathwa ngendlela kwemali yabakhokhi bentela.
Enye yezinkinga ezinkulu zalesi sikhwama, wukuhluleka kwaso ukuhlonza abafundi okufanele bahlomule kusona, sibuye sikhokhele abantu okungafanele bahlomule kusona.
Okulahlisa ithemba ngokwebiwa kwemali yizikhulu nabangani bazo ezinhlakeni zombuso, wukuthi sekuphele iminyaka eminingi uhulumeni wenza izithembiso zokuthi uzowuqeda lo mkhuba, nokuthi abawenzayo bazoboshwa, bajeziswe, kodwa lokhu kakwenzeki. Empeleni izikhulu eziboshwa, zijeziswe ngamacala azo kuleli lizwe lethu, zisuke zineshobolo ngoba iningi lamasela liyazichanasela nje, kalenziwa lutho.
Noma singenalo ithemba lokuthi ubusela buyoke buqedwe emazingeni kahulumeni, ngeke sithule, singakhuthazi ukuthi abenzi bobubi kumele bajeziswe, kwenziwe ngabo izibonelo.
Nakulolu daba LWENSFAS, sethemba ukuthi unzimande uzomemezela ukuthi zinyathelo zini umnyango wakhe osuzithathile ukukhalima ubusela, nokuthi bazokwenziwa njani abasolwa ngokuzitapela emalini yethu.