Uthanda ukuvakashela amazwe aseziqhingini

Ukuzifela ngezinja kwenjini yestellenbosch kwenza yazifuya

UBEFISA ukuba ngusomabhizinisi odumile ngakubo u-antonio van Wyk (22) ovutha engabaselwe enkabeni yesisu kwistellenbosch FC kodwa wagcina eqoke unobhutshuzwayo.

Uvan Wyk udabuka e-erica Park, ewestern Cape, edume ngokuba yindawo enobugebengu. Ufunde esymphony Primary, esilvermony Academy nasobuntu High School lapho ephothule khona umatikuletsheni ngo-2018.

Uqale ukudlala ibhola egijima kwidelas Spurs ngakubo ngaphambi kokuthatha iso leold Mutual Academy ebiphethwe ngugeorge Dearnaley owaduma kumazulu FC.

Ube esedlulela kubuntu Cape Town Academy ephethwe ngucasey Prince. Uhlale iminyaka cishe ewu-7 kulesi sikhungo edlala nabadlali okubalwa kubona noluke Fleurs obegijima kwikaizer Chiefs odlule emhlabeni ngeledlule edutshulwa edunwa imoto egoli.

Usuke kubuntu waqoma istellenbosch FC afike kuyona wagijima kwimultichoice Diski

Challenge

(MDC) eseyaziwa ngeledstv

Diski Challenge

(DDC) ngaphambi kokwenyuselwa esikimini esikhulu ngusteve Barker ongumlolongi wale kilabhu asephenduke insika yayo esiswini.

Phakathi kwezinye izicoco azinqoba kubalwa nayo IMDC necarling Black Label Knockout abayidle kule sizini. Useke wabizelwa naseqenjini lesizwe lika-u/23 ngudavid Notoane eminyakeni edlule. Ingxoxo kavan Wyk ne

LANGA Lempelasonto ngempilo yakhe yangaphandle kwenkundla ihambe kanje:

I/L: Sixoxele ngekhaya okhulele kulona?

Van Wyk: Ngiphuma emndenini obungeswele kepha abazali bami basebenze kanzima ukusibeka kuleli zinga esikulona. Ngaphandle kwabo ngabe izinto kazizange zilunge, badlale enkulu indima empilweni yami.

I/L: Nibangaki kwenu?

Van Wyk: Ngingedwa, ngihlala nobaba (uclifford van Wyk) nomama unormalia van Wyk.

I/L: Usuthathile?

Van Wyk: Cha, kodwa konke sekuseduzane. Ukhona engizimisele ngokumenza inkosikazi yami. Kangifuni ukuxhamazela uma sengithatha isinqumo sokushadelwa.

I/L: Ungumuntu onjani?

Van Wyk: Ozithobile futhi ohloniphayo. Kukhona konke empilweni ngiyazinikela emsebenzini wami engiwenzayo. Ngiyabesaba abantu abaningi. Yingakho isikhathi esiningi ngisichitha ngokuzihlalela ekhaya nomndeni wami.

I/L: Uthanda nhloboni yokudla?

Van Wyk: Ngizifela nge-pasta, i-lasagne.

I/L: Uphatha nhloboni kamakhalekhukhwini?

Van Wyk: Ngisebenzisa i-iphone 14.

I/L: Ukhona ezinkundleni zokuxhumana?

Van Wyk: Ngisebenzisa i-instagram newhatsapp nakhona ukuze ngikwazi ukuxoxa nomndeni wami.

I/L: Uhamba ngamotoni?

Van Wyk: Yipolo Vivo. Ngiyikhonze kakhulu ngoba iyakwazi ukonga uphethiloli onyuka ngamandla kuleli.

I/L: Uthanda umbala onjani?

Van Wyk: Oluhlaza okwesibhakabhaka nobomvu.

I/L: Yisiphi isipho ofisa ukusipha abazali bakho?

Van Wyk: Wukuqhubeka nokubahlonipha ngibanike uthando ukuze baziqhenye ngami. Okunye, ngilwa nokunweba umuzi wasekhaya. Lezi yizona izinto ezimqoka kimina okwamanje.

I/L: Usebenzisa uhlobo olunjani lwesiqholo?

Van Wyk: Yichristian Dior neoh-so-heaven.

I/L: Ukhule uthanda yiphi ikilabhu kanobhutshuzwayo eningizimu Afrika?

Van Wyk: Bengizifela ngesupersport United. Bengiyithatha njengenye yamakilabhu kumbe isikhungo esikhulu ngaleso sikhathi.

I/L: Yiliphi izwe ofisa ukulivakashela?

Van Wyk: Ngisafisa ukuvakashela ebali nasemauritius kwazise ulwandle lwakhona lungihlaba umxhwele. Ngifisa ukuhambisa umndeni wami khona uyoshaywa wumoya.

I/L: Yini into yokuqala oyenzayo uma uvuka ekuseni?

Van Wyk: Wukuvuka ngiguqe ngamadolo ngibonge umdali kukhona konke angenzela khona empilweni yami ngaphambi kokudla isidlo sasekuseni.

I/L: Yisiphi isilwane osithandayo?

Van Wyk: Yinja futhi nasekhaya ngizifuyile ukuze zikwazi ukugada umndeni wami.

I/L: Usontaphi?

Van Wyk: E-old Apostolic Church ecape Town.

I/L: Yimuphi umdlalo othanda ukuwubuka kumabonakude?

Van Wyk: Ngithanda ukubuka ama-series akwinetflix ikakhulukazi irehl Steel nelusabell.

I/L: Ngabe ukhona umdlali kanobhutshuzwayo obukela kuyena?

Van Wyk: Ukermit Erasmus we-orlando Pirates ongumgadli noreneilwe Letsholonyane owayegijima kwikaizer Chiefs.

I/L: Uthanda luphi uhlobo lomculo?

Van Wyk: Ngiyazifela ngomculo wama-2000’s nowejewish Word.

I/L: Yimaphi amakhokho owasebenzisayo?

Van Wyk: Yipredator yakwa-adidas.

I/L: Yiliphi iphupho osenalo osafisa ukulifeza uma usubeke amakhokho ethala?

Van Wyk: Wukuqhubeka nokwenza kahle, ngibuyele kwibafana Bafana, ngaqala ukuthola ithuba esikwatini ngo-2018 emdlalweni wokuhlungela i-afcon sibhekene nezambia.

U-ANTONIO van Wyk westellenbosch FC osephenduke injini kule kilabhu yasewestern Cape. Uzifela ngokermit Erasmus wepirates ongezansi kwesokudla. IZITHOMBE NGABE: BACKPAPGEPIX.COM NE-INSTAGRAM (I/L)