U-HUNT UDALULA OKUMSHINTSHISE ABEKHOLELWA KUKHONA
UVEZA okumenze washintsha abekholelwa kukhona ugavin Hunt (osesithombeni) oqeqesha isupersport United ezobhekana nestellenbosch FC kwi-quarter final yenedbank Cup namuhla ngomgqibelo ngo-15h00 edanie Craven Stadium, estellenbosch.
Uhunt uke waduma ebholeni lakuleli njengomqeqeshi okholelwa kubadlali asebekhulile.
Bekumsebenzela lokho njengoba ekwaze ukunqoba inqwaba yezicoco okubalwa kuzona nezeligi.
Nokho ubukeka eseshintshe kakhulu selokhu ekhuze ibuya kwisupersport, njengoba esedlala ngabafana abasebancane.
Kulezi zinsuku eqenjini lakhe uvamise ukudlala ngo-ime Okon (20), ushandre Campbell (18), ubilal Baloi (20), u-etiosa
Ighodaro (22), ukegan Johannes (22) noselaelo Rasebotja (22), ukukha nje phezulu.
Uhunt, ebuzwa ngokushintsha abekholelwa kukhona, uthe: “Uma ngingakhuluma iqiniso, okuyikhona okungenze ngashintsha yisimo semali, amakilabhu adonsa kanzima ngakwezomnotho.
“Amakilabhu amaningi kawasakwazi ukuthenga abadlali ababizayo. Yingakho kungiphoqa ukugcina sengidlalisa abafana abasebancane.
“Kunzima manje, kufanele sizikhiqizele abadlali ngoba eningizimu Afrika abadlali sebebiza ngendlela eyesabekayo.”
Ephawula ngomdlalo wabo nestellies, uthe: “Umqeqeshi usteve Barker wenza omkhulu umsebenzi kwistellenbosch, wonke umuntu uyazibonela lokho.
“Useyiphendule yaba yingozi kuwona wonke amakilabhu.
“Okungichazayo ngaye wukuthi naye uyakholelwa kubadlali abasebancane, uyabanika ithuba.
“Silindele umdlalo onzima kubona ikakhulukazi njengoba besekhaya.
“Kodwa-ke sizozama ngawo wonke amandla esinawo ukuthi siwunqobe umdlalo, yize kuzoba nzima.”