UMOTAUNG UQINISEKISA EYOMQEQESHI OMUSHA EZIMPOFANENI
KUVELA amagama abaqeqeshi abanohlonzo ohlwini lwabagaqele isikhundla esiqhoqhobelwe ngucavin Johnson kwikaizer Chiefs ebhinjelwa yizinto kulezi zinsuku.
Kumagama ahamba phambili ngelikabennie Mccarthy okwimanchester United, okubikwa ukuthi abaphathi bayo bamanqika ukwelula inkontileka yakhe kule kilabhu eyintandokazi emhlabeni.
Abanye abavelayo ngupitso “Jingles” Mosimane okwi-abha Club yasesaudi Arabia, naye izinto ezingamhambeli kahle selokhu ethathe izintambo.
Kawasali namagama ojose Peseiro waseportugal, unasreddine Nabi wasetunisia, uraul Caneda wasespain, uvanderlei Luxemburgo no-alexander Gallo basebrazil Brazil, nomanqoba Mngqithi okwimamelodi Sundowns.
Ngemuva kwenkonzo yesikhumbuzo sikaluke Fleurs, ukaizer Jnr Motaung oyisporting Director , futhi oyindodana kakaizer Motaung, uveze kwabezindaba ukuthi noma kanjani le kilabhu izokuba nomqeqeshi omusha ngokuqala kwesizini.
Uthe kakukhathalekile ukuthi usukaphi futhi uhola malini kwazise bafuna ukuyibumba kabusha njengoba ingenzi kahle kuyona yonke imidlalo.
“Sizimisele ngokuguqula izinto ngesizini ezayo. Siqale ngesizini edlule ukubheka umqeqeshi, kepha hhayi yena yedwa, sifuna ithimba lonke labaqeqeshi.
“Kasifuni ukuxhamazela ngesinqumo,” kusho umotaung.
Uqhube wathi inombolo yejezi likafleurs (26) ngeke isasetshenziswa kule kilabhu ukuhlonipha lo mdlali odlule emhlabeni kabuhlungu ngesandla sabasolwa abavelile izolo ngolwesihlanu ekuseni enkantolo enkulu yaseroodepoort.
Utheo Fleurs, onguyise kaluke, uthe ubenesifiso sokubona abasolwa njengoba ethi bafana nabantu abamephuce iqatha emlonyeni, kwazise lo mdlali ubewusizo olukhulu emndenini.
Uthe ngesikhathi kwenzeka lesi sigameko, naye ubeyothenga egalaji lokwetha uphethiloli ecape Town, wabona ngendlela okuthule ngayo endlini ukuthi kukhona okushaya amanzi.
Uthi kuthe izingane zimazisa ngokwenzekile wazizwa ephelelwa ngamandla.