ZIZOQASHWA NGESO LOKHOZI IZINTATHELI NGEZINSUKU ZOKHETHO
IZOKUBHEKA ukusebenza nokuziphatha kwezintatheli zemikhakha eyehlukene inhlangano yabahleli bezindaba Kwazulunatal, isouth African National Editors Forum (SANEF).
Umgqugquzeli wale nhlangano EKZN, ujudy Sandson, uthe kwesinye isikhathi ayenzeka amaphutha, kodwa ngokujwayelekile, le nhlangano nabemithombo yezindaba eyehlukene babika kahle kakhulu ngokhetho.
Uthe ngaphandle kokubheka ukusebenza nokuziphatha kwezintatheli, bayanxusa ukuthi nabaholi bezombusazwe balihloniphe iqhaza labezindaba ekubikeni ngokhetho.
Iningizimu Afrika izobamba ukhetho lukazwelonke nolwezifundazwe ngomhla ka-29 kunhlaba (May) nonyaka.
“Ukubika kwabezindaba kulawulwa yizigaba zomthetho olawula ukuphathwa kwezwe lakuleli.
“Sinxusa amaqembu ezombusazwe ukuba adedele abezindaba ukuba babike izindaba ngokukhululeka ngaphandle kokusatshiswa nokuhlukunyezwa.
“Abezindaba kuwumsebenzi wabo ukubika ngakho konke okwenzekayo. Sizozibheka nezintatheli, ikakhulukazi lezo ezijutshwe ezindaweni okwaziwayo ukuthi zinodlame kakhulu.
“Kuyaziwa ukuthi lapha Kwazulu-natal, phambilini kuke kwaba nezigameko zokusatshiswa kwezintatheli. Konke lokho sizokubheka,” esho.
Uthe zikhona izinhlaka okufakwa kuzona izikhalo uma kunokungagculiseki kwabathile ngokubika kwezintatheli.
“Njengabo osopolitiki, nezintatheli kuyenzeka ziphambuke, kodwa lokho kakusho ukuthi kufanele zenze amaphutha ngoba zikhona izinyathelo ezingathathelwa zona, kusentshenziswa izinhlaka zezomthetho.
“Kunohlaka olubizwa ngokuthi yipress Council, IBCCA NE-ICASA okuyizinhlaka ezinemithetho eqinile elawula ukuziphatha kwezintatheli,” kuphetha usandson.