Umlingisi usegxile ekukhiqizeni imidlalo namafilimu
AKAZIBONI ephinde elingisa emidlalweni kamabonakude ekhiqizwe ngabanye ngaphandle uma kungowakhe, umlingisi osephenduke umkhiqizi nomdidiyeli wemidlalo namafilimu ulungelo Dhladhla.
Ulungelo odabuka enanda, usematheni kulezi zinsuku ngokuba ngomunye wabadidiyeli befilimu ezokhonjiswa kwinetflix ebizwa ngesoweto Blaze. Waziwa ngokulingisa emidlalweni eyahlukene kumabonakude okubalwa kuyo ugugu no-andile, i-intersexions, idream World neminye.
Besekunesikhathi agcina ukubonakala emidlalweni njengoba esegxile ekudidiyeleni imidlalo namafilimu.
Ekhuluma neLANGA ulungelo, uthe uyakuthokozela ukusebenza ngemuva kwekhamera njengoba kwakuvele kuyiyona nto ayifundela.
“Empeleni ukungena kwami kulo mkhakha, ngangizoba ngumuntu osebenza ngemuva, ngaba nenhlanhla yokuthi kube nezindawo engibizelwa ukuyozilingisa,” kusho ulungelo.
Uthi akakaze aye kokwenza inhlolokhono, kuzona zonke izindawo abezilingisa kumabonakude ubesuke ebizelwe kuzona.
“Senganele ngesipiliyoni engisitholile ngokulingisa, inhloso yami enkulu wukuqhubeka nokukhula, ngikhiqize imidlalo namafilimu ethi mina. Iyona ndlela engizimisele ukukhula ngayo kulo mkhakha,” esho.
Uthe uma kwenzeka ebonakala, kuzobe kuwumdlalo okhiqizwe noma odidiyelwe nguyena.
Uchaze ifilimu isoweto Blaze njengezothokozelwa ngabantu abahlukene, iqukethe amahlaya nokushubisa.
“Esikhathini esiningi uma kukhiqizwa amafilimu emzansi, ahlezi enodlame nobugebengu. Lena yehlukile ngoba ingabukwa yinoma ngubani. Iveza olunye uhlangothi abantu abazohleka uma belubuka,” kusho yena encoma ukuhlanganyela okube khona ngesikhathi kuhlanganiswa le filimu.
Uthe kunobuhle nobubi ukusebenzisana nabantu abahlukene uma kukhiqizwa ifilimu, njengoba kwesinye isikhathi imimoya ibuye iphakame nokungagcina kukapakela emsebenzini, ungaphumi uyilento ebihlosiwe.
“Kwisoweto Blaze, sisebenze ngokubambisana, nami ngakuqonda obekudingeka kimina nabanye benza obekubhekwe kubona nokwenze kwaba kuhle ukusebenzisana.”
Uthe kuyamthokozisa ukuthi izinga lokuqopha amafilimu nemidlalo kamabonakude, kuleli selikwelomhlaba.
“Inkinga esisabhekene nayo, wukuthola ibhajethi ehambisana namafilimu njengoba kusenzima ukungenelela kwezinkampani ezizimele,” kusho le ntokazi.
Uthe umatasa usebenzisana namatvet College angaphansi kwe-africa Media Business Academy, lapho eqeqesha khona izitshudeni ngalo mkhakha, ezamabhizinisi kuwona, ukuxhumana nabezindaba nokumaketha.
Ulungelo useke wahlabana ngendondo yegolden Horn ngaphansi komunxa webest Lead Actress in a Lead Role ngendawo kagugu emdlalweni ugugu no-andile. Ungumsunguli nomnikazi wenkampani yokuqopha imindset Concept ne-africa Television Market.