UMNYANGO NEZINHLELO ZOKUGCWALISA EZOTHISHA
IZINHLAKA zemfundo eyisisekelo zicacise ngombiko kangqongqoshe wemfundo eyisisekelo, unkk Angie Motshekga (osesithombeni), othi zingaphezu kuka-31 000 ezweni lonke izikhala zothisha ezingagcwalisiwe.
Lokhu kuvele ngolwesine embikweni oyimpendulo kangqongqoshe abephendula kuyo amalungu eqembu eliphikisayo, idemocratic Alliance (DA), ngezinkinga ezikhungethe umnyango wakhe.
Umotshekga uthi ziwu-31 400 izikhala zothisha ezingagcwalisiwe, kanti ikwazulu-natal ihamba phambili njengoba ziwu-7 044 ezingagcwele, ilandelwa yieastern Cape ngeziwu-6 111.
Kulowo mbiko uthi kodwa kalikho ikilasi elingenaye uthisha. Uthi umnyango usezinhlelweni zokugcwalisa lezo zikhala ngendlela efanele, wathi izikole zinelungelo lokuqoka okufanele abambe okwesikhashana.
Okhulumela umnyango wezemfundo eyisisekelo umnu Elijah Mhlanga, uhambe emazwini kangqongqoshe ethi: “Okwenza sithi izikhala eziwu-31 000 ‘kazinamuntu’ yingoba abakuzona kabaqashiwe ngokugcwele. Uhlelo luhlukene izigaba ezimbili; esokuqala yi-post level one, lapho nesikole sinelungelo lokuziqokela obonakala efanele ukugcwalisa isikhala, silandela imigudu yokubikele umnyango.
“Esesibili ngesokukhushulwa ezikhundleni kothisha (promotional level), lapho kusuke kuqashwa izinhloko zomnyango (HODS) nothishanhloko namasekela abo, okuyizo-ke ezithatha isikhathi eside ngoba ukuvalwa kwezikhala zabo kumele kukhangiswe, bese kuhlungwa abafake izicelo, okuwuhlelo olungathatha isikhathi esilinganiselwa ezinyangeni ezintathu kuya kweziyisithupha,” esho.
Umhlanga uthi ngesikhathi kubhalwa le mpendulo, izikhala ezazingagcwalisiwe zazingaphezu kuka-31 000 kodwa kungenzeka ukuthi sezinciphile noma sezingaphezulu kwaleli nani.
“Kungenzeka isibalo sehlile noma senyukile kuleli nani njengoba luqhubeka uhlelo lokugcwaliswa kwazo njengoba sinothisha abathatha imihlalaphansi, nokunye,” ephetha.
Umqondisi wenyunyana yothisha ithe National
Professional Teachers’ Organisa-tion of South Africa (NAPTOSA), umnu Basil Manuel, usike elijikayo kulolu daba, ethi kuwumsebenzi weminyango yezemfundo ezifundazweni ukugcwalisa izikhala zothisha. Uthi uma umnyango ungalusukumeli lolu daba, kungenzeka izwe lilahlekelwe ngothisha abaseqophelweni.
“Ukucacisa nje embikweni kangqongqoshe, akuchazi ukuthi lezi zikhala eziwu-31 400 kazinamuntu obambe kuzona, kodwa eziningi zinothisha abasebenza ngezinkontileka noma lokho kungayilungisi inkinga.
“Sizolahlekelwa ngothisha abasezingeni uma bengaqashwa ngokugcwele njengoba sibabona sebeqala ukuyofundisa kwamanye amazwe. Esikufisayo nezinye izinyunyana wukuthi othisha baqashwe ngokugcwele, lowo-ke wumsebenzi womnyango wezemfundo ezifundazweni,” esho.
Umanuel uthi ngokujwayelekile iziphakamiso zokuqashwa ngokugcwele kothisha abasebenza ngezinkontileka, abangekho ezikhundleni, zenziwa yizikole abafundisa kuzo.
Uthe ophenyweni abalwenzile beyinyunyana, bathole ukuthi izikole ziyazenza iziphakamiso, kodwa kube wumnyango ezifundazweni nasezifundeni ongalandeleli ngokuqashwa kwabo ngokugcwele.