KUKHUTHAZWE IZAKHAMIZI UKUBIKA INKOHLAKALO EYENZEKA EZINKANTOLO
THANDOLUHLE NGUBO
UNXUSE izakhamizi ezakhele ichatsworth ukuba zibike lonke uhlobo lwenkohlakalo olwenzeka ezinkantolo umnu John Jeffery, oyisekela likangqongqoshe wezobulungiswa namajele.
Ukusho lokhu kuvulwa ngokusemthethweni izakhiwo ezilungiswe kabusha enkantolo yemantshi yasechatsworth ngolwesihlanu. Uthe banethemba lokuthi ubulungiswa buzobonakala, nezakhamizi zakule ndawo ngeke zisahamba amabanga amade uma zidinga ukuya ecaleni.
“Ngeke simelane nenkohlakalo eyenzeka ezinkantolo, esingabala ukunyamalala kwamadokodo, ukukhokhelwa kwezisebenzi ukuphuma nezinqumo noma ukuphoqwa ngabathile ukukhipha imali uma befuna ukuvuliswa amadokodo njengenecwadi yesivimbelo.
“Sicela izakhamizi zibike ubugebengu obungaba khona,” echaza.
Ujeffery uthi le nkantolo yengezwe ngezintathu zesifunda
eyokuqulwa kwamacala okuhlukumeza ngokocansi, amacala athinta izingane nawemindeni.
“Le nkantolo beyincane kakhulu.
Njengamanje seyinazo zonke izimfanelo zenkantolo yemantshi ephelele. Indlela eyakhiwe ngayo, kawukwazi ukubona umehluko phakathi kwezakhiwo ezilungisiwe nalezo ezintsha.
“Okuhle ngayo wukuthi izisulu zokudlwengulwa zizozizwa ziphephile futhi zivikelekile njengoba inkantolo yokuqulwa kwala macala inegumbi ‘elincane’ elizohlala isisulu ukuze singamboni umenzi wobubi ngesikhathi kuqhubeka ukuqulwa kwecala futhi zikwazi ukufakaza ngokukhululeka,” kusho Jeffery.
Ungqongqoshe wemisebenzi yomphakathi nengqalasizinda, umnu Sihle Zikalala, ukuchithile ukuthi le nkantolo ivulwe ngalesi sikhathi ngenhloso yokukhankasela ukhetho.
“Ngiyazi-ke ukuthi kukhona ababuzayo ukuthi kungani lesi sakhiwo sivulwa manje. Wukuthi ukwakhiwa kwayo kuphele ngalesi sikhathi, besingeke sikuhlehlise ukuthi ivulwe. Inhloso wukuthi sifuna wonke umuntu alingane phambi komthetho, babone nobulungiswa ngale kokuhamba amabanga amade,” ephetha.
Ingxenye yezisebenzi ezakhe le nkantolo bekungezendawo, futhi ezinye zazo ziphume nezitifiketi zamakhono ezizoziphilisa ngazo.