Ilahlisa ithemba eyodokotela abangaqashiwe eningizimu Afrika
Sekube nemibhikisho eyahlukene kuleli, bekhala ngokuhlala neziqu bengayitholi imisebenzi
AKEKHO owayazi ukuthi kuyofika isikhathi lapho odokotela beyoswela khona umsebenzi eningizimu Afrika! Ngenxa yobumqoka bomkhakha wezempilo, bekwaziwa ukuthi uma ufundele ubudokotela, uthi uphuma enyuvesi neziqu zakho ube uthola umsebenzi.
Nokho, izinto sezishintshile, njengamanje sekwenzeka obekungacatshangwa.
Muva nje sekubonakala odokotela abaqeqeshiwe bebhikisha, bekhala ngokuswela umsebenzi nokungaqashwa wuhulumeni.
Nakuba kwaziwa ukuthi isimo sokwentuleka kwemisebenzi eningizimu Afrika sibi kakhulu, kodwa mhlawumbe akekho obelindele ukuthi sekungaze kubonakale nodokotela imbala bebhikishela uhulumeni, bekhala ngemisebenzi.
Mhlawumbe le mibhikisho yodokotela abaswele umsebenzi iyinkomba yokujula kwenkinga yezinga eliphezulu lokwentuleka kwemisebenzi eningizimu Afrika, kanti ingahle ilahlise ithemba nakwabanye abantu abalangazelele ukubona uguquko kwezomnotho, kwanda amathuba emisebenzi ezweni.
Inkinga yodokotela abangaqashiwe igqame kakhulu ngonhlolanja (February) nonyaka, ngesikhathi iqulu lodokotela, amanesi nezinye izisebenzi ezisemkhakheni wezempilo, libhikisha liya e-union Buildings, epretoria.
Lezi zisebenzi zezempilo bezifuna umengameli wezwe ukuba angenelele, kwandiswe imali eyabelwa umnyango wezempilo ukuze ukwazi ukuqasha odokotela nezinye izisebenzi zezempilo.
Omunye wodokotela owayekulo mbhikisho, umandla Matshabe wasehayzview, empumalanga, waphawula emthonjeni wabezindaba igroundup, wathi akaze acabange ukuthi uzokweswela umsebenzi eseqede uqeqesho lwakhe.
Umatshabe ungomunye wodokotela abaqeqeshwe ecuba ngokohlelo lwesivumelwano sokusebenzisana phakathi kukahulumeni wakuleli nowasecuba.
Ngaphandle kwalowo mbhikisho owawusepretoria, ngawo unhlolanja kwaba khona omunye wodokotela ababalelwa cishe ngaphezu kuka-100 Kwazulunatal, abangaqashiwe, abalibangisa ehhovisi lomnyango wezempilo esifundazweni, nabo bekhala esifanayo.
Bona bagcine sebeqhinqe ngaphandle kwalawa mahhovisi, befuna uhulumeni uphendule izikhalo zabo.
Umnyango wezempilo Kwazulu-natal, ugcine usumemezela ukukhangiswa kwezikhala zemisebenzi ewu-120 zodokotela okuthiwe abazoqashwa, bazoqala ukusebenza mhla lulunye kunhlaba (May) nonyaka.
Okuxaka kakhulu ngendaba yokwentula imisebenzi kodokotela wukuthi ezikhungweni zikahulumeni zezempilo kunenkinga eyaziwayo yokushoda kodokotela.
Emitholampilo nakwezinye
izibhedlela kukhalwa imihla namalanga ngokushoda kwabo.
Lokhu kushoda kodokotela abaqashiwe ezikhungweni zikahulumeni kuholela ekutheni labo abaqashiwe bagcine bebhekene nomthwalo onzima ngenxa yomthamo omkhulu wabantu abadinga ukuxilongwa.
UKUQASHWA KODOKOTELA BASE-CUBA
Okunye okumangazayo kule ndaba yodokotela abaswele imisebenzi wukuthi uhulumeni wakuleli uyakwazi ukulanda odokotela bangaphandle ecuba bazosebenza kuleli, bakhokhelwe izizumbulu.
Ezinsukwini ezimbalwa ezedlule kuvele ukuthi umnyango wezempilo egauteng uwodwa, kungabalwa ezinye izifundazwe, ukhokhela odokotela basecuba abawu-11 abasebenza ezibhedlela zasegauteng u-r14 million ngonyaka.
Lokhu kuvele empendulweni kankk Nomantu Nkomo-ralehoko,
ngesikhathi ephendula umbiko kamnu Jack Bloom, wedemocratic Alliance (DA), oyilungu lesishayamthetho sasegauteng.
Ngokusho kukamnu Bloom, ungqongqoshe uthi ukuqashwa kwalab’ odokotela basecuba kuhambisana nesivumelwano sokusebenzisana phakathi kweningizimu Afrika necuba.
Kulab’ odokotela, abane kubikwa ukuthi basebenzela ejohannesburg Metro Health District; abathathu basebenzela Ekurhuleni Metro Health District; ababili basebenzela esedibeng Metro Health District; oyedwa usebenzela ethelle Mogoerane Hospital; oyedwa usebenzela etembisa Hospital.
Ngokwempendulo ubloom athi uyithole kungqongqoshe, umholo walab’ odokotela ngonyaka uphakathi kuka-r1,2 million kuya ku-r1,64 million ngonyaka umuntu emunye.
Uthi (ubloom) kuyaxaka ukuthi kuqashwa odokotela basecuba esikhundleni sokuba kuqashwe odokotela baseningizimu Afrika abaqeqeshiwe kodwa abaswele umsebenzi.
Ngomasingana (January) nonyaka, isouth African Medical
Association Trade Union (SAMATU) yabika ukuthi ngokwemininingwane (data) eyayitholakale kwinhlolovo eyayenza, kwakunodokotela abangaphezu kuka-800 abaqeqeshiwe futhi baphothula zonke izigaba zoqeqesho, kodwa ababengaqashiwe.
Nokho ungqongqoshe wezempilo kuzwelonke, udkt Joe Phaahla, ekuqaleni kukanhlolanja nonyaka ubike ukuthi ohlwini lodokotela abawu-825 abangaqashiwe, umnyango wakhe owawuluthunyelelwe YISAMATU, bathole ukuthi bawu694 odokotela abese bephothule zonke izigaba ezenza umuntu abe ngudokotela ngokugcwele.
Wathi enye ingxenye yabo isadinga ukuqedela uqeqesho lokusebenza ezikhungweni zezempilo emphakathini.
UHULUMENI UKHALA NGOKUNGABI NAYO IMALI EYENELE
Kule nkinga yokungaqashwa kodokotela, umnyango wezempilo wakhala ngokushoda kwemali kuhulumeni, kanti ubuthembise ukuthi kuzoqashwa njengoba kuqale unyaka omusha wemali ngombasa (April).
Ngawo unhlolanja, udkt Phaahla wayethe enselelweni yokwentuleka kwemisebenzi yodokotela, iminyango yezempilo ezifundazweni iyaqhubeka nokuxoxisana neminyango yezemali khona ezifundazweni ukuze kutholakale izindlela zokubhekana nale nkinga yochwepheshe bezempilo abantula umsebenzi.
Waveza ukuthi kusukela ngomfumfu (October) ngonyaka odlule kuze kube manje, kuqashwe odokotela, kwagcwaliswa izikhala eziwu-564, wathi kunezikhangiso zemisebenzi ezikhishiwe ngawo unhlolanja eziwu239, wathi ezinye izikhangiso eziwu-375 zizokhangiswa ezinyangeni eziyisithupha.
INSELELO KUHULUMENI
I-SAMATU yaphonsela uhulumeni inselelo yokusukumela phezulu indaba yodokotela abangaqashiwe. I-SAMATU yakhala ngokuthi kunabantu abama olayini abade kakhulu (ezikhungweni zezempilo) belinde ukuthola usizo, kodwa kunodokotela abahleli emakhaya abangaqashiwe.