Umzali angazibona kanjani izimpawu ze-autism enganeni
Ungoti uthi ukuba nalesi sifo akusho ukuthi ingane izothatha kancane emqondweni
UDOKOTELA wezigulo zengqondo wexwayisa abantu ngokujaha ukusola ukuloywa, ukuphendukelwa yidlozi noma ukubheda komsamo lapho ingane kuthiwa ine-autism.
Lokhu kuchazwa njengokuphazamiseka ekukhuleni komqondo lapho ingane ikhula.
Kuyenzeka ezikhathini eziningi umzali wengane ahlale nayo kodwa engazi ukuthi inalesi sifo. Kubalulekile ukuthi uma kunezimpawu ongaziboni kahle enganeni yakho, usukume uye kodokotela abazokwazi ukusheshe babheke ukuthi ingane inani.
Njengoba kuyiworld Autism Month, sixoxe nesazi zezigulo zengqondo ngezinto abazali okumele baziqaphele kubantwana babo.
IZIMPAWU ZE-AUTISM
Udkt Manqoba Myeni oyi-psychologist esebenzela edurdoc Centre, ethekwini, uthi uma ingane inalokhu kugula, ibonakala ngokungakwazi ukukhuluma eminyakeni okumele engabe isiyakwazi ukhuluma, ibe nenkinga yokuxhumana nabantu noma nezinye izingane.
Uthi kokunye ingane iyaye izifake engozini esobala, kodwa yona ingayiboni.
“Ezinye izingane kazihlaliseki phansi (hyperactive), kepha ziba nokuphithizela okungaqondakali.
“Ngokujwayelekile izingane uma zikhula, kazihlaliseki phansi, ziyathanda ukudlala.
“Kumele kwehlukaniseke ukudlala okwejwayelekile nokudlala kokugula. Lokho kungabonwa ngodokotela abaqeqeshelwe lokho.
“Kubalulekile ukuthi uma lokho kwenzeka enganeni yakho, ungazitsheli ukuthi yinto encane nje ezodlula, sukuma ukuze usheshe uthole usizo,” kuchaza udkt Myeni.
IPHUTHA ELENZIWA NGABANTU
UTHI abantu baye benze iphutha
lokucabanga ukuthi ingane ene-autism izothatha kancane emqondweni.
“Baningi ososayensi abadumile okwakuthiwa bane-autism, ngisho urichard Brsnson ongumsuli wevirgin Active, le abantu abajima kuyona, naye ungabanye babanaso lesi sifo.
“Kusuke kungasho ukuthi uzothatha kancane emqondweni uma unenkinga ye-autism, kepha kusho ukuthi kukhona okwehlukile ngawe nendlela owenza ngayo izinto.”
Uthi abanye abantwana abaneautism bayakwazi ukufunda ezikoleni ezejwayelekile, yize abanye bedinga ezikhethekile (special schools) lapho befunda khona amakhono nezinye izindlela abangakwazi ukuziphilisa ngazo.
UKWELAPHA
Uthi kayikho imithi ekhona yokwelapha lokhu kugula, kepha
kuba nemithi yokukwehlisa.
“Kuba nemithi esiza ukwelapha imithelela nezimpawu ezihambisana ne-autism ngoba kwesinye isikhathi uthola ukuthi inolaka imithi, isuke izodambisa lezo zimo ezikanjalo,” esho.
SIHLONZWA KANJANI LESI SIFO?
Udkt Myeni uthi kuye kudingeke ithimba elehlukene lodokotela ukuba livumelane okubalwa kulo:
– Udokotela wezingane (pediatrician) ozobheka ukuthi ingane ikhula kahle yini
– Udokotela wengqondo (psychologist) ozobheka ukusebenza kahle komqondo nomoya wengane
– Umeluleki wezokukhuluma
(speech therapist) osuke ezobheka izinto ezithinta ukukhuluma
– Udokotela oyi-occupational
therapist
Uthi kubuye kudingeke nombiko wasesikoleni ochaza ngokuziphatha kwengane nokwenza kwayo ezifundweni zayo.
IZIMPAWU ONGAZIBHEKA ENGANENI
Ziyehluka izimbawo ezinganeni ezisencane kunasezinganeni esezithe ukukhula.
Uthi kokunye kuyenzeka kuthi ngisho ingane uyibiza ngegama layo, ingakuphenduli, ithule nje kube sengathi kayizwa, kokunye ingakubuki emehlweni wena muntu osuke ukhuluma nayo.
Enye ingane kuyenzeka idume ngokuthi kayikukhonzile ukuhleka, ngisho kungathiwa wena uyamoyizela ubheka ngakuyo, iyathula nje ikubuke.
Ezinye izingane ziba nenkinga yokuvukwa wulaka uma zizwa iphunga elithile, uma zidla into ezingayithandi noma kunohlobo lomsindo abalubona njengoluziphazamisayo.
Abanye abantwana bathanda ukulokhu benza into eyodwa ngaso sonke isikhathi, njengokushaya
izandla noma kunyakazisa umzimba.
Udokotela uthi umntwana onalesi sifo akakuthandisisi ukukhuluma nabanye, futhi akakuthandi nokudlala.
Okunye ongakuqaphela wukuthi izingane ezine-autism ziba namagama awodwa ezikhonze ukuwasebenzisa.
Ezinganeni esezikhulile, kuthiwa zijwayele ukubonakala sengathi kaziqondi ukuthi kwenzekani eduze kwazo.
Ingane iyaba nento eyodwa nje ebonakala iyithanda okudlula ezinye izinto. Laba bantwana kuthiwa baba nenhliziyo encane uma ubabuza okuthile, bakhombise ukucasuka nje esikhaleni.
Kuthiwa indlela abaqonda ngayo, kayifani nezinye izingane ngoba kawukwazi ukukhuluma sakufanisa ngoba bona bazitshela ukuthi usho lokho, kawufanisi.
Okunye okuthiwa babhekana nakho wukuthi kabakwazi ukukhuluma kahle ngemizwa yabo noma kukhona okubaphethe kabi noma okubaphoxile.
Udokotela weluleka abazali ukuba bazinike isikhathi nezingane zabo, bakhe ubudlelwano nazo.
“Uma uqhelelene nomntwana, uzongakwazi ukubona uma kukhona into okumele uyisukumele, ubonane nodokotela, noma uma kukhona okushintshayo enganeni yakho,” esho.
Unxusa abantu ukungakhombani ngeminwe emindenini ukuba kutholakala ukuthi ingane inenkinga ye-autism.
“Kwesinye isikhathi uthola umakoti esegxekwa ngokuthi wufuzo lwakubo, abasemzini bethi kabakaze babe nomlando walolu hlobo lokugula emndenini.
“Uma ungathi uzama ukuthola ukuthi wufuzo ngolukabani, ungagcina ukhathele ingqondo ngoba kakulula ukuthola lokho.
“Kepha kumele kusizwe ingane, ithole usizo olufanele,” kuphetha udokotela.