Asigwinyisi mathe isimo somnotho
Ucwaningo luveza ukuthi sizokwenyuka isibalo sabantu abahleli emakhaya abaswele imisebenzi
UVEZA isithombe esingesihle ngesimo sezemisebenzi eningizimu Afrika umbiko wakamuva weinternational Monetary Fund (IMF), oqagula ukubhebhetheka kwenkinga yokuntuleka kwemisebenzi kuleli.
Ochwepheshe bezomnotho kulo mbiko wocwaningo obizwa ngeworld Economic Outlook, oshicilelwe ezinsukwini ezimbalwa ezedlule, baqagula ukuthi inkinga yokwentuleka kwemisebenzi kuleli isazoba nzima kakhulu kunalokhu eyikhona njengamanje.
Kuqagulwa ukuthi lizokwenyuka lifinyelele ku-33,5% kulo nyaka izinga labantu abahleli emakhaya ngenxa yokungawutholi umsebenzi.
Ngonyaka ozayo futhi (2025) kuqagulwa ukuthi lizophinde lenyuke lifinyelele ku-33,9%.
Kuvela lo mbiko nje, ngomhla ka-20 kunhlolanja (February) nonyaka, umnu Risenga Maluleke oyinhloko yestats SA, waveza embikweni wocwaningo lwezemisebenzi obizwa phecelezi ngequarterly Labour Force Survey, ukuthi engxenyeni yesine onyakeni odlule (2023), izinga labantu abantula umsebenzi kuleli beliwu-32,1%. Engxenyeni yesithathu yonyaka lesi sibalo sezinga labantu abangasebenzi kuleli besikade siwu31,9%.
I-IMF iveza lesi simo esingesihle ngenkinga yemisebenzi eningizimu Afrika, leli zwe livele libhekene nenkinga yokuthi umnotho kawukhuli ngendlela efanele, ehambisana nokudaleka kwamathuba emisebenzi anele.
Ngokusho kwestats SA, kule ngxenye yesine yonyaka owedlule, isibalo sabantu abangasebenzi kuleli sikhuphuke safinyelela ku-7,9 million.
Le nkinga yokwentuleka kwemisebenzi ibhebhetheke kakhulu emuva kokubheduka kokhuvethe okwaholela ekukha-hlamezekeni okukhulu komnotho, kwavalwa izinkampani, izinkumbi zabantu zaphelelwa yimisebenzi.
Ukushuba kwesimo kuze kwaholela ekutheni uhulumeni uqhamuke nesixazululo sesikhashana sokulekelela abantulayo - wasungula isibonelelo sika-r350 sabangasebenzi, esibizwa phecelezi ngokuthi yisocial Relief of Distress Grant (SDR Grant).
Nakuba lesi kwakuyisibonelelo sesikhashana, kodwa namanje sisaqhubeka ngenxa yokuxakeka kwabantu abaswele imisebenzi.
Ngeshwa futhi, kuwona umbiko WE-IMF, ochwepheshe balindele nokuthi liqhubeke nokuba phansi kakhulu izinga lokukhula komnotho waseningizimu Afrika njengoba beqagula ukuthi kulo nyaka, umnotho uzokhula ngo-0,9% bese kuthi ngozayo ukhule ngo-1,2%.
Emazweni athuthukayo asengxenyeni ye-afrika isub-saharan akeliswe neningizimu Afrika kubalwa nenigeria, kanti yona umnotho wayo unezinkomba zokwenza kangcono kuneningizimu Afrika njengoba kuqagulwa ukuthi umnotho wayo uzokhula ngo-3,3% kulo nyaka, bese kuthi ngozayo usimame ngo-3,0%.