Ukuphila ngezikweletu nokungathuthukiswa kwentsha ngokwamabhizinisi kunomthelela ekusigqilazeni
INYANGA kambasa (April) ingenye yezinyanga ezibalulekile kakhulu kuleli lizwe njengoba iyinyanga yenkululeko kanti kulo nyaka, izwe lihlanganisa iminyaka engamashumi amathathu (30) lathola inkululeko.
Uma sibheka inkululeko yezombusazwe nokuyiyona okumele ilethe intuthuko yezomnotho nokukhula ezimalini, kubukeka kusinda kakhulu.
Ngokwami inkululeko kayiphelele uma ingenawo umnotho nomhlaba ngoba awukho umbuso ongama ngaphandle komnotho, amandla emali, umhlaba nemikhiqizo.
Konke lokho uma umbuso ungenakho, uyazifanela nombuso ohluphekayo, nokusho ukuthi akusiwona umbuso kodwa okusho ukuthi ukubusa akuphelele uma izwe lisahlupheka futhi lintula imisebenzi.
Masikhumbule ukuthi inkululeko emnothweni akusiwona umsebenzi kahulumeni, kodwa kumele kube yinjongo yawo wonke umuntu nemindeni kuleli.
Singabantu sesithembele kakhulu kuhulumeni, nokwenza sicabange ukuthi zonke izinto kumele senzelwe noma sixhaswe, kodwa akumele kube njalo.
Kufanele amalungu emindeni, nemiphakathi iqhubeke izithuthukise ngokwamabhizinisi nokufunda izindlela zemali nomnotho.
Yebo uma sibungaza inyanga yezenkululeko, kuhle lokho kodwa kule minyaka engamashumi amathathu akusafanele ukuthi singakhala ngobandlululo, nathi sekumele sizibheke ukuthi yini esingayenzi kahle ukuthuthukisa umnotho nemali yethu.
Indlela esithanda ngayo izikweletu noma sekungenasidingo, nayo inomthelela ekugqilazekeni kwabantu, ikakhulukazi labo abathanda izinto.
Izinombolo zikhombisa ukuthi bangaphezulu kuka-19 million abantu abasebenzisa izikweletu eningizimu Afrika kodwa uhhafu wabo, uyehluleka wukukhokhela izikweletu nokwenza amagama abo angabimahle emabhukwini ezikweletu (credit bureaus).
Ukungafundiseki ngemali kwabantu, imindeni, abantwana ezikoleni nakho kunomthelela ongemuhle ekuphatheni kwethu imali, nokuthembela kakhulu ezikweletini nakuhulumeni.
Ukulwela inkululeko yemali nomnotho sekulele ekutheni sizikhulise ngolwazi lwamabhizinisi, umnotho, umhlaba, imali
nobudlelwano obuhle emiphakathini.
Kumele singene emabhizinisini akhiqizayo okungaba wukudla noma yimpahla. Kumele singene emabhizinisini athinta ukubheka nemboni yemali nemishwalense, kanjalo futhi emabhizinisini ezokwakha nezindlu nokufundela imisebenzi edingeka kakhulu emhlabeni nasezweni.
Kulesi simo samanje kubukeka
abantu abasha benganakiwe, zingekho izinhlelo eziqondene nokubakhulisa ngokwamakhono, nangokwamabhizinisi nangomnotho.
Ukungafukulwa kwabantu abasha kusho ukuthi eminyakeni emibalwa ezayo, ikusasa laleli lizwe lizolimala kakhulu.
Uma izinto zingathuthuki, kuvuleka igebe phakathi kwabacebile nabaswele, kuyogcina ngokuthi sivukelane sodwa, okuyinto engagwemeka kusemanje.
Ngokombono wami, inkululeko yomnotho izotholakala ngokuthi sikhuthalele ukufunda ngezindlela zokuphumelela emalini, emabhizinisini nasemindenini.
Akumele sithembele kuhulumeni ukuthi uzosenzela yonke into. Kumele sisukume sizenzele njengesiqubulo esithi, ‘Vuka Uzenzele’.
Usiboniso Mtshali ungusomabhizinisi ongumaluleki wezimali osemthethweni (FSP49257), nogunyaziwe ukusiza abasezikweletini (NCRDC3326) nokudayiswa nokuthengiswa kwemizi (FFC: 1197883) kanye nokwakha izindlu (NHBRC3000286136). Email: admin@moneyrepublic. co.za. Whatsapp: 0768100953.