Wayeqinisile umafukuzela ngokuthi, isitha somuntu nguye uqobo
MHLELI: Kangibhali lo mbono ngoba nakhu kukhona umholi kumbe inhlangano ethile yezombusazwe engihlose ukuyinyundela.
Ngedlulisa ukukhathazeka kwami ngalokho engikubuka kuwukucabanga okufushane kwabanye abantu bakuleli abakukhombisa njengoba sibheke okhethweni lukazwelonke nolwezifundazwe olumhla ka-29 kunhlaba (May) nonyaka.
Kunabantu obezwa bekhuluma ukuthi bakholwa yiyo yonke 'imbudane' abayizwa ngosopolitiki.
Ngizokha nje phezulu komengameli ababili esibanikwe wukhongolose ukuhola elakuleli kule minyaka ewu-15 edlule, okungumnu Jacob Zuma nomnu Cyril Ramaphosa, ngokwahlukana.
Bobabili basishaye ngemfe iphindiwe izikhawu eziningi, besethembisa ukulwa nobubha obuhlasele ikakhulukazi abaphofu kodwa lutho ukubona imiphumela yezethembiso.
Kunalokho umnotho wezwe ushone phansi ngendlela exakile ngaphansi kobuholi bawo womabili la madoda. Uyawabona futhi ukuthi kawadeli ukuzicebisa njengoba namanje esalambele ukuphatha lesi sikhundla esimqoka kunazo zonke kuleli.
Ngazi kahle ukuthi unobhalajikelele WE-ANC umnu Fikile Mbalula wayekhulunyiswa yinhliziyo ebuhlungu ngesikhathi egonyuluka ngokuthi kudala 'babemvikela uzuma emahlazweni kubalwa nelithinta ukusetshenziswa budlabha kwemali yabakhokhi bentela ngenkandlagate'.
Lokhu umbalula ukuveze esidlangaleni ngoba nakhu uzuma esephenduke imbangi enkulu kakhongolose ngeqembu aliholayo umkhonto wesizwe Party (MK).
Ngazi kahle ukuthi nephala Phala karamaphosa iyovuka ime ngezinyawo mzukwana izwe lawela kunoma iyiphi imbangi yakhe.
Okungikhathazayo-ke ngabavoti wukuthi izinto ezenzeka phambi kwabo sengathi kabazinaki, bafana nowesifazane okuthi esebudlelwaneni obumuhlukumezayo kodwa aqhubeke nabo yize enalo ithuba lokuphuma kubona.
Ngiyafisa sengathi elakuleli lingaba okungenani namaqembu amathathu ezombusazwe, nawo izakhamizi zihlale ngokuwashintsha emandleni ukuze akhuphule amasokisi uma esaphethe.
Njengoba izinto zisame ngalolu hlobo nje kuleli, ngibona inhlupheko isazonyuka kakhulu kunakuqala.
Okubi nje wukuthi ukwenyuka kwayo kusuke kuzohambisana nobugebengu obunamandla obubhebhezelwa yindlala, obuvele obubhilitile emiphakathini esiphila kuyona kule mihla.
Sengathi ingqondo yomuntu omnyama ingaswabuluka eminyakeni ezayo ukuze bakwazi ukuthatha izinqumo ezizobakhipha ebugqilini, hhayi ezizobacindezela kuze kulamule ukufa.
Udkt John Langalibalele Dube, umafukuzela Onjengezulu washesha ukuyibona inkinga ekhungethe isidalwa esingumuntu okwenza wathi, 'isitha somuntu nguye uqobo lwakhe'.