Kasifuni ukuphola isilonda ‘sokurojwa’ kwabosuthu
Bazolwela ukuqeda isikhwakhwalala uma bebhekene ne-orlando Pirates
ISAQAQAMBA inhliziyo yomqeqeshi wamazulu FC ngezimbangi azobhekana nazo emdlalweni obhekwe ngabomvu ngabathandi bebhola. Usuthu luzodudulana ne-orlando Pirates kowedstv Premiership namuhla ngomgqibelo ngo-17h30 e-orlando Stadium, esoweto.
Abalandeli bakanobhutshuzwayo bakuleli bamagange ngalo mdlalo kwazise la makilabhu ngeledlule abebhekene kwi-quarter Final yenedbank Cup emoses Mabhida Stadium, ethekwini. Kugcine kunqoba ipirates ngo-4-2.
Umqeqeshi wamazulu upablo Martin uphume ethukuthele kulo mdlalo njengoba ekholwa wukuthi barojwe kubuka izwe lonke kuwona.
Lo mqeqeshi akakufihlanga ukuthi isaqaqamba inhliziyo njengoba beya emdlalweni ofaniswa nomzuliswano wesibili nebucs ezinsukwini ezimbalwa. “Sizilungiselele kahle, yikhona nje ukuthi sisazama ukudlulisa okwenzeke ngomgqibelo odlule kwi-quarter Final. Siyazama ukuzelapha imiqondo ngoba namanje sisenawo umuzwa wokuthi besingcono kunezimbangi kuzona zonke izingxenye zomdlalo (odlule).
“Sisaphoxekile kodwa okuhle wukuthi sinalo elinye ithuba lokudlala nabo futhi. Kuzoba nzima ngoba sidlalela ekuhambeni, kuba nezinselelo ukudlala e-orlando.
“Sikuqonda kahle ukuthi bangenye yamakilabhu amakhulu e-afrika yonkana. Sidlala nabo ngeledlule ngikholwa wukuthi kube ngumdlalo wethu omuhle kunayo yonke esiyidlale ngale sizini.
“Ngicabanga ukuthi abantu sibabukise umdlalo omuhle ngale sizini kuleli. Kodwa-ke okufanele sikwenze njengoba siya kulo mdlalo wukuthi siwasebenzise amathuba esiwatholayo, singene ngobuthaka babo.
“Sibhekene nenselelo yokubehlula
ngoba sesiside kakhulu isikhathi sihluleka wukubaguqisa.
“Kufanele sikuqinisekise ukuthi siyawunqoba lo mdlalo ngoba sifuna ukuqeda sisendaweni enhle kwi-log,” esho.