Ifuna kuphenywe ngemoto okuthiwa iyayisebenzisa inyosi
Isiqashwe esikhundleni esimqoka wumasipala izululand
IFISA kujutshwe uphenyo olunzulu, oluzophenya ngemoto okuthiwa iyayisebenzisa inyosi yesilo umisuzulu kazwelithini, umnu Buzetsheni Mkhuliseni Mdletshe (65) wakwaceza, egazini, olundi.
Kusukela umdletshe ekhonjwe indlela yihhovisi likandunankulu wakwazulu-natal, unkk Nomusa Dube-ncube, kube kuningi ukuqagulisana ngakho.
Izolo ngolwesihlanu umdletshe utshele ILANGA Lempelasonto ukuthi ukhathazekile ngenkulumo eshiwo ngundunankulu ohlelweni lwezindaba emsakazweni ukhozi FM ngolwesithathu, lapho eveze ukuthi kunemoto ayisebenzisayo kahulumeni.
Undunankulu ubecacisa ukuthi kalikho igazi elibi phakathi kukamdletshe nehhovisi likandunankulu.
“Ukuhoxiswa kwenkontileka yokusebenza nohulumeni kakuzange kungiphathe kabi, kodwa osekungihlukumeza kakhulu yile nkulumo eshiwo ngundunankulu ohlelweni lwezindaba okhozini, uma ethi kunemoto engiyisebenzisayo.
“Kayikho imoto engiyisebenzisayo mina. Kungenzeka ukuthi undunankulu uzitshela ukuthi wayinika mina kanti cha, kakunjalo. Ngiyafisa kuphenywe ngalokho ukuze kuzwakale ukuthi ikuphi le moto akhuluma ngayo.
“Bangephuca imoto yabo ngolwezi (November) 2020, bathi kangisenalo ilungelo lokuyishayela nokuyisebenzisa. Ngicela kulungiswe lokhu,” kusho umdletshe ngomoya ophansi.
Odabeni lwakhe kuphinde kwafakazeleka isisho sesizulu esithi, “ukuwa kwenndlu wukuvuka kwenye” njengoba kuthe kungakapheli izinsuku ekhonjwe indlela yihhovisi likandunankulu, waqashwa wumasipala izululand. “Kuyiqiniso, ikhona incwadi engiyitholile yenkontileka eyizinyanga eziyisithupha ecacisa ukuthi sengizosebenzisana nomasipala izululand. “Ngijabule kakhulu ngethuba lesibili elivelile. Okungijabulisa kakhulu kulona wukuthi ngizosebenza nentsha njengoba bethe ikhono enginalo masizame indlela yokuthi ledlulele ebantwini abasha ukuze baqonde kangcono ngamasiko,” kusho umdletshe.
Uphinde waveza ukuthi akaphathekile kabi ngokuxoshwa kwakhe ngoba uhulumeni encwadini yokumxosha, ucacisile ukuthi kawunamali.
Oyisikhulu esiphezulu kumasipala izululand, unkz Sindi Linda, ukuqinisekisile kuleli phephandaba ukuthi yibo abakhiphe isitatimende ngokuqashwa kukamdletshe.
Ngokwalesi sitatimende, umdletshe uqashwe njengesenior Arts & Culture Co-ordinator uzosebenzela esikhungweni Indonsa Arts and Craft Centre, lapho kuzobe kulindeleke aqeqeshe intsha kwezamasiko.
Imizamo yokuthola ukuphawula kwehhovisi lindunankulu kayiphumelelanga, ucingo lukamnu Bongi Gwala belukhala lungabanjwa, kuze kwashaya isikhathi
sokuloba.