Umlingisi uveza okuzokwenza azikhiqizele imidlalo yetv
Unephupho lokuba ngumsakazi wokhozi FM eminyakeni ezayo
UKULINGISA izindawo eziphambana nenkolo akholelwa kuyona yikhona okuzogqugquzela isilomo somlingisi ukuzikhiqizela eyaso imidlalo ngokuhamba kwesikhathi.
Lokhu kuvezwe ngumuzi Mthabela okusanda kuvela izindaba zokushiya kwakhe kwigenerations The Legacy eboniswa KWISABC 1 - wajoyina imy Brother's Keeper ekhonjiswa kumzansi Magic (channel 161).
Ekhuluma NELANGA Lempelasonto ngalezi zinguquko ezenzeka empilweni yakhe umthabela obedlala indawo kankosiyabo kwigenerations - uthe bese kuyisikhathi sokuthi awushiye lo mdlalo njengoba bese kuphele iminyaka emibili nengxenye elingisa kuwona.
Uncome kakhulu isikhathi asichithe kwigenerations njengoba eveze ukuthi kube yintokozo ukulingisa kulo mdlalo akhule ewubukela.
Ubusisekile elingisa notau benokarabo akhule ebabuka kwigenerations
“Kube yisibusiso ukuthi ngibe yingxenye yegenerations ngaphinda ngathola nethuba lokulingisa notau (urapulana Seiphemo) nokarabo (uconnie Ferguson) okuyibona engikhule ngibabukela kulo mdlalo. Nami ngizongena emlandweni ukuthi ngibe ngomunye wabalingisi balo mdlalo osuneminyaka ukhonjiswa kuleli,” esho.
Uthe esikhathini samanje kuhle ukuba ungahlali endaweni eyodwa isikhathi eside njengoba neziteshi zikamabonakude seziziningi, kukhona neze-internet ishowmax nenetflix.
“Okuhle ngokubonakala emidlalweni eyahlukene wukuthi kawugcini usubizwa ngegama lendawo yakumabonakude ngoba nakhu abantu kabakwazi ulingisa ezinye izindawo. Okunye wukuthi kukhulisa ikhono lakho ukubonakala ulingisa izindawo ezahlukene futhi ezingafani,” esho.
Uyingxenye yesiteshi
seyoutube sokhozi FM, Ukhozi TV
Umthabela - oseke wabonakala elingisa emidlalweni okubalwa kuyo Isibaya, inikiwe, Imbewu neminye uphinde abe yingxenye yesiteshi seyoutube sokhozi
FM,
Ukhozi
TV.
Uthe usazoqhubeka nokuba yingxenye yaso lesi siteshi futhi unxusa abantu ukuba bazibukele iziqephu eziphuma njalo ngesonto, ezitholakala kusona.
Umthabela ungomunye wabalingisi abasha abazobonakala kwisizini yesibili yemy Brother's Keeper njengoba isanda kuqala kanti uzolingisa indawo kamqondisi Shabalala ongumfowabo kashabalala. Uchaze indawo kamqondisi njengezohambisana negama layo njengoba ezoqondisa izinto aphinde ashukumise kulo mdlalo.
Uzohlangana nezilomo aseke walingisa nazo phambilini
Uthe okuhle ngokuba yingxenye yalo mdlalo wukuthi uzohlangana nabanye abalingisi asake wasebenza nabo phambilini futhi uyalibabaza nekhono labo kumabonakude, esho abala abalingisi abaqavile kulo mdlalo okukhona kubona usdumo Mtshali, unkanyiso Mchunu, uzola Nombona, ulindani Nkosi nabanye.
Umthabela uzichaze njengomuntu okholwayo, okwenza kwesinye isikhathi kube nzima ukulingisa ezinye izindawo kumabonakude. Uthe kwesinye isikhathi uyaphoqeleka ukuba alingise izindawo ezingahambisani nenkolo yakhe okuyinto emgqugquzelayo ukuthi ngokuhamba kwesikhathi azikhiqizele imidlalo yakhe, ehambisana nayo (inkolo yakhe).
Ukusho lokhu echaza isiqephu lapho ezovela eshisa khona impepho okuyinto athe kayisahambisani naye nje-ngoba engumuntu okholwayo. Lesi siqephu sizovela kwimy Brother's Keeper.
Kuzokhumbuleka ukuthi lo mlingisi ngesikhathi eshiya kwimbewu kwasabalala izinsolo zokuthi kwakuneziqephu ayezilingisa ezabe ziphikisana nenkolo yakhe.
Uphethe ngokutshela leli phephandaba ukuthi ngelinye ilanga uyafisa ukuthi abe ngumsakazi kulona Ukhozi FM.