Mayicaciswe eyesikhundla sikamengameli uma kunqoba umbimbi lwamaqembu
MHLELI: Ngiyavumelana nabo bonke ababuka ukhetho esiya kulo njengolubucayi kakhulu uma beluqhathanisa nolwango-1994.
Ukuba bucayi kokhetho kudalwe wumphumela okhalisa abanye ngomsebenzi kahulumeni wentando yeningi kule minyaka ewu-30 ubusa izwe.
Ukhetho esiya kulona lubucayi ngendlela yokuthi sekuze kwasukuma IDA, I-IFP, i-actionsa namanye amaqembu akha umbimbi ngenhloso yokuba ahlanganise amavoti awo ukuze kugudluke I-ANC emandleni, ebese la maqembu abuse uhulumeni ngokubambisana.
Leli gxathu elithathwe yilawa maqembu asilindele ukuba lisidalele izinxushunxushu kuhulumeni obambisene, uma kwenzeka la maqembu enqoba ukhetho ngokuhlanganyela, inqobo nje uma abaholi bawo bengezobanga izikhundla.
Bekumele amaqembu ombimbi azame ngayo yonke indlela ukuthi uma enqoba ukhetho, kungabi khona izinxushunxushu.
Yingalesi sizathu ngibona kumele ingashaywa indiva eyokuqokwa kukamengameli wezwe kuhulumeni wombimbi. Bekumele amaqembu ombimbi abacacisele abavoti ngezinhlelo zokuphatha uma enqoba, ukuze kungabi khona ukuphikisana okuzobambezela ukuhanjiswa kwezidingo kubantu.
Ngikhumbula impendulo yomholi weda, umnu John Steenhuisen, uma ebuzwa ngololu daba; waphendula ngobukhulu ubuhlakani, wathi akukho angakukhuluma engakabonakali amavoti.
Impendulo yalo mholi yalandela eye-ifp ngomholi wayo umnu Velenkosini Hlabisa, nayo eyaba nobuhlakani ngokuthi yize bekhona ombimbini, kodwa bangenele ukhetho ngokuzimela.
Izimpendulo zalawa maqembu zingivezela ngokusobala ukuthi yize amaqembu abambisene engakaphumeli obala avumelane kwelokuqoka umengameli, kodwa kuyazichaza futhi kulindelekile ukuthi iqembu okuzoqokwa kulo umengameli kube yilelo elithole amavoti amaningi kunamanye. Uma kuwukuthi izimpendulo
zala maqembu zichaza lokhu, bekumele akucacise lokhu, avumelane ukuze singabambezeleki uma enqoba ukhetho, sekubangwa isikhundla sikamengameli.
Sibalulekile kakhulu isikhundla sikamengameli. Kuyaxaka ukuthi udaba lwaso luzitshelwani, ngoba uma kungathiwa iningi lalawa maqembu livumelana NE-IFP neda kolwezinombolo zamavoti, kungabuye kuvumbuke elinye lawo nendlela ehlukile futhi engemukelekile kwamanye yokutomula umengameli, ziqale zisuka izinkinga zikahulumeni wombimbi.
Uthi umbuzo; kuyokwenzekani uma kuphetha ngombango wesikhundla sikamengameli wezwe emaqenjini ombimbi emuva kokhetho?
Cebolenkosi Maphumulo enanda