Ugelant ugaqele ukumela elakuleli okwesithathu kuma-olympics

NOMZWAMANDLA ZONDI

U-ELROY Gelant akakaliphonsi ithawula ngokumela iningizimu Afrika kumaolympic Games azoqala ngontulikazi (July) asongwe ngoncwaba (August) eparis, efrance.

Ugelant – osubathela iboxer Athletics Club – ungomunye wabathwelwe ngeqoma ukukhala emuke nesicoco sedurban International Marathon kusasa ngesonto ezosukela esiphingo isongwe ngaphandle kwasemoses Mabhida Stadium, ethekwini.

Ekuqaleni konyaka lo msubathi uqophe isikhathi esiwu-2:08:56 kwimarathon kanti ukuze akwazi ukuya kuma-olympics, kufanele enze u-2:08:10. Idurban International yithuba elihle kugelant lokuzicabela indlela ebheke eparis.

Lo msubathi umangaze abantu abaningi ngempelasonto edlule ehlomula ngendondo yesiliva kwi-5000m kwi-athletics South Africa Senior Track and Field Championships emgungundlovu.

Ubesanda kwenza okufanayo engena unombolo 2 kwi-absa Run Your City Gqeberha 10K.

Lo msubathi oneminyaka ewu-37 ubudala, wazalelwa egeorge, ewestern Cape, kanti usemele izwe emiqhudelwaneni eminingi okubalwa kuyo nawo ama-olympics.

Uqale ukumela isifundazwe sakhe eneminyaka ewu-9, wahlomula ngezindondo.

Uqede ugrade 12 wayofunda enorth West University (NWU) lapho ephothule khona iziqu zehonours kwilabour Relations nakwihuman Resources.

Ngemuva kweminyaka emibili uthole umsebenzi wokuba yihuman Resource Manager.

I-NWU iphinde yamnika umsebenzi wokufundisa ihuman Resources ne-industrial Pschology kwizitshudeni ezenza unyaka wokuqala nowesibili.

Ubeyingxenye yethimba elalimele izwe kuma-olympics ngo-2016 erio de Janeiro, ebrazil, nango-2020 etoyko, ejapan. Useke wamela elakuleli kuma-african Champs, kwiworld Indoor nakwiworld University Champs.

Uke waphatha irekhodi lakuleli le-5000m ngesikhathi esiwu-13:04, manje eseliphethwe ngu-adriaan Wildschutt.

Ingxoxo kagelant NELANGA Lempelasonto (I/L) ngempilo yakhe yangaphandle kwenkundla ihambe kanje:

I/L: Ungumuntu onjani?

Gelant: Nginomoya ophansi, ngiyawuthanda umndeni wami. Kulula ukungejwayela ngoba ngikukhonzile ukuxoxa.

I/L: Usuthathile?

Gelant: Cha kodwa ukhona umuntu engithandana naye, ngutamzin Thomas. Kasikabi nayo ingane.

I/L: Basaphila abazali bakho?

Gelant: Yebo basekhona. Ubaba ngusteven, umama nguyvonne. Bayikho konke empilweni yami.

I/L: Uyakholwa?

Gelant: Yebo ngilikholwa, ngingumuntu okhuliswe ngenkolo.

Konke engikwenzayo ngiyaye ngibonge kunkulunkulu ngokungibusisa ngekhono.

I/L: Ngubani umuntu obukela kuyena?

Gelant: Ngisakhula bengithanda uhezekiel Sepeng.

Yikhona okwangenza ngaba nesifiso sokuya enorth

West.

Nokho njengoba sengikhulile sengibukela kubazali bami.

Indlela abangikhulise ngayo nezimfundiso zabo yikona okungibeke la ngikhona.

I/L: Ngabe yini osewake wayenzela abazali bakho?

Gelant: Ngiqala ukuvelela kwezokugijima ngabathengela umuzi ecape Town.

Ngisanda kupha umama wami igolf 7 okwakuyimoto yami.

Ngathi ngiqeda ukuyikhokhela ngamupha yona, ngimbonga ngokungikhulisa.

Ngibala umama ngoba imoto nomuzi bahlala kuwona bobabili, kanti nemoto ngeyabo bobabili.

I/L: Uhamba nganhloboni yemoto njengamanje?

Gelant: Ngihamba ngebmw 1 Series.

I/L: Uma uziphumulele, usichitha kanjani isikhathi sakho?

Gelant: Ngiyaye ngivakashele abazali bami, sibuye siziyele olwandle nesithandwa sami utamzin.

Ngikukhonzile nokushisa inyama uma ngihleli nomndeni wami.

I/L: Yiliphi izwe ofisa ukulivakashela?

Gelant: Ngiyathanda ukuya eziqhingini. Ngiyayithanda imauritius nereunion.

Uma ulapho eziqhingini ukhohlwa yizona zonke izinkinga onazo, uhlangana nazo uma sewubuya.

I/L: Yisiphi isilwane osithandayo nosesabayo?

Gelant: Ngithanda uheshe. Impilo yawo akulula ukuyiqonda.

Uyisilwane esinobuhlakani ngendlela eyisimanga. Wenza into ngendlela ehlukile futhi ehlelekile.

Engisesabayo yinja. Zinginika inkinga uma ngiziqeqesha.

Okubuhlungu wukuthi inja kawuyazi ukuthi icabangani.

Kwezasendle ngisaba ibhubesi nazo zonke izilwane eziyingozi.

I/L: Yini into yokuqala oyenzayo uma uvuka ekuseni?

Gelant: Ngivuka ngibonge unkulunkulu, ngenze ama-push

up ambalwa ukuze igazi lihlakazeke kahle, besengiya ejimini.

Njalo ekuseni ngigijima u-14km.

I/L: Ukhonze kudla kuni?

Gelant:

Ngithanda i-pasta nenyama yenkukhu, ngenxa yomdlalo engiwenzayo.

Kodwa kakukho ukudla okwedlula okuphekwa ngumama.

Ngesikhathi ngisakhula bengilithanda iphalishi.

I/L: Uthanda muphi umculo?

Gelant: Ngithanda umculo KA-AKA, nernb ngiyayidlala.

I/L: Yiluphi uhlelo oluthandayo kumabonakude?

Gelant: Ngikhonze ukubuka ezemidlalo, ikakhulu ezokugijima, ibhola lombhoxo, ikhilikithi neformula 1.

I/L: Ngaphandle kokugijima, yimuphi omunye umdlalo owuthandayo?

Gelant: Yibhola lombhoxo. Ngajabula Amabhokobhoko enqoba indebe yomhlaba nyakenye efrance, kanti nekhilikithi ngiyayithanda.

I/L: Ukhonze umbala onjani?

Gelant: Noma yimuphi umbala ngiyawugqoka, kuya ngokuthi ngisesimweni esinjani.

I/L: Ukhona ezinkundleni zokuxhumana?

Gelant: Yebo, ngikufacebook naku-instagram.

I/L: Ubonakala wenza kahle kakhulu kulezi zinsuku, ngabe yini imfihlo yakho?

Gelant: Wukuphila impilo ehlanzekile, kangiphuzi futhi kangibhemi. Ngilala ngesikhathi.

Ngiyazimisela kukho konke engikwenzayo futhi ngiyamlalela umqeqeshi wami.

I/L: Uthini umyalezo wakho entsheni?

Gelant: Intsha kufanele ihloniphe abazali. Labo bantu bazi yonke into ngawe njengoba ukhule phambi kwabo.

Into abakutshela yona kubalulekile ukuba uyilalele.

Ngila engikhona nje, yingenxa yokuthi ngalalela abazali bami.

Abenza ezemidlalo kumele balalele nabaqeqeshi babo.

NGU-ELROY Gelant weboxer AC nesinqandamathe sakhe utamzin Thomas.