Usithebe ucacisa ngekusasa kwichiefs
Uthi izimpofana zibulawa wukuxhamazela phambi kwamapali
UPHUMELA obala ngekusasa lakhe kwikaizer Chiefs umdlali wale kilabhu okuvela ukuthi ihlela ukungayeluli inkontileka yakhe ephela ngokusongwa kwesizini.
Ichiefs izodlala nesupersport United kowedstv Premiership namuhla ngomgqibelo ngo-17h30 epeter Mokaba Stadium, epolokwane. Usiyethemba Sithebe (31) usayiniswe yichiefs kumasizini ambalwa adlule esuka kumazulu FC.
Uke wadonsa kanzima ukuthola isikimu okwenze kwaqina izinsolo zokuthi le kilabhu ngeke iyelule inkontileka yakhe ephela uma kusongwa le sizini. Nokho lo mdlali usezibuyisele esikimini futhi udlala kahle, yikona nje ukuthi le kilabhu kayiyitholi imiphumela emihle.
Ekhuluma nabezindaba lo mdlali odabuka enewcastle, Kwazulu-natal, uphumele obala ngekusasa lakhe kwichiefs.
“Inkontileka yami iyaphela kodwa njengomdlali into emqoka kimina njengamanje wukusiza ikilabhu ngoba iyangidinga, kakhulu futhi. Sinengcindezi njengoba kufanele sidlale le midlalo esele. Udaba lwenkontileka yami ngizoqala ukubhekana nakho ngokuphela kwesizini,” esho.
Ephawula ngomdlalo, uthe: “Njengabadlali kufanele sizilungiselele ngokomqondo. Umdlalo esiya kuwona unzima ngoba nabo kabenzi kahle. Silindele umdlalo onzima ngoba wonke umuntu ufuna ukuqeda ngegiya eliphezulu, sonke sifuna ukuqeda sikwi-top 8.
“Njengabadlali kufanele selulekane,
sikhohlwe ngokubi, sibheke okuhle. Sidlala kahle inkinga wukukora amagoli. Ejimini siyazama ukukhuthazana selulekane ukuthi ebhokisini masizame ukungatatazeli. Uma singayilungisa le nkinga yamagoli noma kanjani sizoyinqoba imidlalo.”