I-AM IHLELA UKUYIZUMA NGOKUSHESHA I-PIRATES
IHLELA ukuzuma i-orlando Pirates ngamagoli asheshayo iroyal AM emdlalweni wala makilabhu wedstv Premiership ozokuba kusasa ngesonto ngo-15h00 eharry Gwala Stadium, emgungundlovu.
Ukabelo Mahlasela (33) olihlikihla esiswini kwi-am, utshele abezindaba ukuthi nakuba beya kulo mdlalo ngaphandle komdlali omqoka osesibhedlela, uzukile Mkhize kodwa bafuna ukuwunqoba noma yikanjani. Uthi lo mdlalo uzokuba nzima kubona ngoba bazokube beqala ukudlala nepirates eharry Gwala.
Uthi kuzokuba wumdlalo onzima kunayo yonke asebeke baba nayo ekhaya kule sizini njengoba nebucs isefomini. Uthi unethemba lokuthi abalandeli bazofika ngezinkani enkundleni ukuzobakhuthaza. Uthi bazolwela ukuthola amagoli ngokushesha ukuzama ukuthena izitha zabo amandla.
“Njengoba silwela ukuqeda sikwi-top 8 nje ngokusongwa kwesizini, nebucs ifuna ukuqinisa indawo yayo okuzokwenza lo mdlalo ushube,” esho.
Ujohn Maduka opheka I-AM, uthi konke sekumi ngomumo ngalo mdlalo. “Ngeke sikwazi ukuvumela abadlali benze amaphutha enkundleni. Kumele siphaphame sonke ukuze sithole umphumela omuhle kulo mdlalo. Okuhle wukuthi lo mdlalo sizowudlalela eharry Gwala, ngiyazi ukuthi kasejwayele ukulahla amaphuzu kule nkundla.
“Abadlali kufanele benze isiqiniseko sokunqoba ukulwela ukuba asheshe alulame uzukile osasesibhedlela. Ngiyazi ukuthi ukuba ubekhona ubezokwenza izimanga,” kusho umaduka.
Kubadlali ababhekiwe kulo mdlalo kwi-am umxolisi Macuphu, usibusiso Magaqa, uruzaigh Gamildien nothabo Matlaba ongukaputeni. Kwipirates kubhekwe udeon Hotto, uthalente Mbatha, urelebohile Mofokeng ukukha nje phezulu.
Amathikithi abiza u-r100. Kulo mdlalo kuzohlomula nomlandeli ozokwazi ukukhahlela iphenathi kunkanyiso Mchunu ongumlingisi wakumabonakude ngesikhathi sekhefu. Ozokwazi uzozitholela ur200 000.