USUTHU NEZINHLELO ZOKUGILA IZIMANGA NGESIZINI EZAYO
UMQEQESHI wamazulu FC upablo Martin (osesithombeni) udalule ukuthi sebeziqalile izinhlelo zokulungiselela isizini ezayo ngenhloso yokwenza kangcono kakhulu kuyona. Usuthu luzogadulisana nechippa United kowedstv Premiership namuhla ngomgqibelo ngo-15h00 emoses Mabhida Stadium, ethekwini. Luzokuya kulo mdlalo luzikhotha amanxeba njengoba lusanda kwehlulwa yi-orlando Pirates emidlalweni emibili ilandelana ngokwahlukana okuwu-4-2 kwi-quarter Final yenedbank Cup ethekwini no-10 koweligi egoli. Ekhuluma ngaphambi komdlalo wechippa lo mqeqeshi, uthe bazokwenza konke okusemandleni ukuqoqa amaphuzu aphelele njengoba besekhaya. “Sizimisele ngokwenza kangcono emidlalweni yethu esele ngenhloso yokuqeda endaweni ehloniphekile. Ngikholwa wukuthi (kule sizini) senze kangcono kakhulu kunangedlule.
“Inhloso yethu wukubeka ikilabhu endaweni ehloniphekile, yingakho sesiqalile nokuqalaza lapho singalungisa khona ukuze sizokwazi ukwenza kahle nangesizini ezayo.
“Silindele umdlalo onzima kwichippa njengoba ikhombisa ukuba sefomini kulezi zinsuku.
“Wonke amalungiselelo ethu ahamba kahle kakhulu, kangingabazi ukuthi sizokwenza kahle ukuze sijabulise abalandeli bethu abahlala beseseka ngaso sonke isikhathi,” esho.
Lo mqeqeshi odabuka espain ufike nolukhulu ushintsho osuthwini njengoba lubukeka ludlala ibhola elihle muva nje.
Nakuba ekhuluma kanjena lo mqeqeshi kodwa uyazi ukuthi bazothwala uthayela kunomoya kwichippa ebukeka isefomini enhle muva nje okufakazelwa wukuthi iguqise ikaizer Chiefs nesupersport United ngokulandelana okuyenze yenyukela endaweni engcono kwi-log.
Kuzokhumbuleka ukuthi nyakenye ichippa yasinda ngemizuzu yokugcina ezembeni eladla imarumo Gallants nemaritzburg United. hudla@ilanganews.co.za www.ilanganews.co.za