USEBUYISELE IMPAHLA YOMBUSO UNTLEMEZA
USEWUBHULILE umlilo obuzosha ubuhanguhangu obeyinhloko yophiko lwamaphoyisa oklebe uLiet General Mthandazo Ntlemeza ngokushesha abuyisele emuva imoto nomakhalekhukhwini waloluphiko emuva kokuba uNgqongqoshe wamaphoyisa uMnu Fikile Mbalula emsabise ngokumbopha.
Ummeli kaLiet Gen Ntlemeza, uMnu Comfort Ngidi, uthe lona ammele usezibuyisile izinto kepha wexwayisa uMnu Mbalula ukuba ayeke ukubanga umsindo ngaloludaba ngoba lusasezithebeni zenkantolo kungenzeka noma yini ngalo.
UMnu Ngidi uqhubeke wathi usewafakile amaphepha okwedlulisa isinqumo senkantolo enkulu yamajaji yaseNorth Gauteng, enkantolo yokwedlulisa amacala eBloemfontein esichitha ukuphatha kukaLiet Gen Ntlemeza.
UMnu Mbalula ubemnqumele ugwayi katiki uLiet Gen Ntlemeza wathi akabuyise impahla yoklebe ngokuphazima kweso ngoMsombuluko. exwayisa uLiet Gen Ntlemeza ukuba abuyise ngokushesha okuqondene naloluphiko ngoba uma engakwenzi lokho uzoboshwa.
“Ngicela azi uLiet Gen Ntlemeza ukuthi ukuya emsebenzini asebenzise izimpahla zombuso kuyicala akabuyise imoto yomsebenzi nomakhalekhukhwini. Lokhu akwenzayo kuyicala elibomvu ngoba noma esedlulisile isinqumo akalwe nongqongqoshe ngommeli wakhe njengoba kwenzeka naku Robert McBride obeyinhloko yophiko oluphenya amaphoyisa,” kusho uMnu Mbalula ngokufutheka.
UMnu Mbalula uphinde wakugcizelea ukuthi oyinhloko ebambile njengamanje nguNkz Yolisa Matakata ngakho akakwemukele uLiet Gen Ntlemeza akushoyo.
Kwenzeka lokhu nje inkantolo enkulu yamajaji eGauteng ichithe isicelo sikaLiet Gen Ntlemeza sokuba abuyiselwe esikhundleni sakhe emuva kokuba ithole ukuthi ukuqokwa kwakhe bekungekho emthethweni.
Kanti ngakolunye uhlangothi lapha eThekwini kunecala elethweswe obeyinhloko yalo lolu phiko namaphoyisa akhe oku-ngamacala aphathelene nokubulala.
Icala lisaqhubeka abameli babasolwa basanxusa umshushisi ukuba alihoxise lelicala.