Okubalulekile empilweni wukuqhubekela phambili
KAYIKHO into emhlabeni ebuhlungu njengokungazi ukuthi yisiphi isinqumo okufanele usithathe esimeni obhekene naso.
Ziningi izimo abantu ababhekene nazo empilweni kodwa othola ukuthi umuntu uyazibuza ukuthi ngiphume kanjani kulesi simo. Abanye bahlukumezeka emsebenzini, umuntu asale ezibuza ukuthi ngiyeke noma ngingayeki?
Omunye uhlukumezeke ebudlelwaneni, asale ezibuza ukuthi aphume noma angaphumi? Kwesinye isikhathi kube ngabangani bakho abakudicilela phansi, usale uzibuza ukuthi wehlukane nabo noma qha?
Yingakho thina esivamise ukuxazulula izinkinga zabantu sihlale sithola imibuzo eqhamuka kubona ethi ngehlukane kanjani nomuntu okungahlukaneki naye.
Uzwa omunye ethi sengihlaliswe wukuthi sisuka kude naye, sikhohlwe ukuthi impilo kayinamsebenzi nokuthi nisukaphi kodwa inendaba nokuthi niyaphi ngoba uma ningasayi ndawo nifana namanzi ami ndawonye (ichibi) agcwala onoshobishobi.
Kule ngosi yanamhlanje ngithanda sifundisane ukuba sibheke ukuthi umuntu usithatha nini isinqumo noma uma kwe- nzenjani. Singakhohlwa njalo ukuthi isinqumo kumele uzithathele wena.
Zimbili izinto okufanele zidale ukuba uthi uyaqhubeka yini nomuntu noma qha: okokuqala ukuthi uma into eyayinihlanganisile ingasekho futhi ingasenzeki, ungabe usabuza elangeni, thatha isinqumo (decide).
Okwesibili ukuthi uma into eyayinihlanganisile isikuzwisa ubuhlungu obukhulu kangangokuba usufuna ngisho ukufa kunokubekezelela into enje, phuthuma unqume.
Ezinye izinqumo empilweni kawuzithathi usineka futhi ngeke uzithathe uhlafuna ushingamu kodwa uyozithatha izinyembezi zehla ngoba noma ungasithanda kanjani isicathulo kodwa uma sesikudala ikhona (isilonda) ngenxa yokuthi siyakumpintsha, isuke ingasekho into ongayenza ngoba isicathulo kasinwetshwa ( enlarge) nonyawo futhi ngeke ulunciphise ukuze lungene kulesi sicathulo osithandayo.
Uma isicathulo sikufanela, noma sikumpintsha uzwa abantu bethi saze samfanela, singuyena nje kanti kabazi ukuthi usigqokile nje udla imihlathi ngoba siyakumpintsha.
Banjalo-ke nabantu obathandayo empilweni yakho kodwa nquma uma sebedala amakhona.
Uma sekunjalo-ke empilweni yakho ubokwazi ukuthi abantu abaseceleni kwakho kababuzwa ubuhlungu bekhona kodwa buzwiwa nguwena. Kubhlungu-ke ukuhamba ngesicathulo esidala ikhona, sikumpintsha. Kubuhlungu nokuhlala nomuntu endlini okudala ikhona.
Kuwubulima ukuyobuza kubantu ukuthi ngisenzenjani lesi sicathulo ngoba singidala amakhona? Uyofa nini uqinwa yisicathulo?
Umuntu oqinwa yisicathulo noma angaphuza amaphilisi ezinhlungu ngeke amaphilisi awushintshe usayizi wezicathulo.
Kunabantu-ke empilweni abangeke bashintshwe nguwena okufanele uthathe isinqumo ukuthi wenzenjani uma bekumpinstha kanje? Onendlebe makezwe lokho umoya akushoyo.