ZININGI IZILINGO EZIPHAZAMISA UMUNTU OZILILE
SIPHETHA imbenge ngokubheka isiko lokuzila jikelele.
Uma sithi umuntu uzilile noma isizwe sizilile sisuke sisho ukuthi lowo muntu usesimeni sokushaya indiva yonke imisebenzi ajwayele ukuyenza noma kulokho ajwayele ukuzithokozisa ngakho aqhele kukhona.
Ngamazwi alula kuchaza ukuthi usuke ezincisha ubumnandi kepha ngenhliziyo ezincengela noma eshweleza kuMdali noma kwabakubo ngokumehlele. Osuke eshonelwe usuke ehlonipha lowo ongasekho kumbe ezelapha yena ngokwakhe kulokho okusuke kumehlele aze azenelise ukuthi umnikile isizotha esimfanele lowo ongasekho.
Sesizwile izazi zamasiko zisicebisa ngokuzilela umuntu oshonile nezindlela amakhosi aphethe izwe azila ngazo uma ehanjelwe yilunga lomndeni. Siyathanda ukuba senabele nasekuzileni okwenziwa ngamakholwa ekususela embhalweni weBhayibheli elingcwele.
Lapho sizwa ukuthi iNkosi uJesu ubeke azile izinsuku ezingama-30 engakuthi mbibi ukudla ekhuluma noYise oseZulwini uNkulunkulu emncenga ecela amandla kuyena.
Kuthiwa lapho walingwa nguSathanae embhuqa ethi akaguqule itshe alenze isinkwa waze wamedelela ethi uma engahlukana noYise angamnika yonke ingcebo yomhlaba kepha uJesu wamhebeza wathi akasuke kuye wagcina ehlulekile.
Kulolu hlobo lokuzila ukudla akuthintwa.
Kusobala-ke ukuthi akhona la mandla kuleli siko lokuzila ngisho abaMhlophe bengakafiki kuleli abomdabu bebevele bazi ukuthi isiko lokuzila liba nomphumela omuhle ekugcineni.
Ngisho amaJuda imbala leli siko ayelilandela kuze kube namuhla.
Siyaqaphela futhi ukuthi uma umuntu ezilile, ziba ziningi izilingo ezimphazamisayo okugcina ngokuba izifiso zakhe zingaphumeleli ngoba usuke esefeyilile.
Kukaningi nasekuthwaseni kwezangoma kuzwakala ukuthi kukhona ezidla imbumba konke lokho kusukela khona lapho ekwehlulweni wukuzithiba ezintweni ezimnandi.
Isifundiswa esinophondo ekhanda, uDkt Velaphi VVO Mkhize, usanda kusifundisa ngezangoma ezingathi shu ezibhula impuqumpuqu ugwayi kakholo.
Lesi sifundiswa esiyisangoma futhi esiphethe amathwasa sithi maningi amathwasa alingeka esezigodlweni ehluleke wukuzithiba adle isithelo esiphakathi nensimu kubhede wonke umsamo bese kumele aqale kwa-a ahlawule ageze isigodlo kube njeya.
"Uma umuntu ethwasa kumele azi ukuthi uzilile akazenzi izinto eziningi ezenziwa ngabanye. Ngisho ukudla okudliwa ngamathwasa kukhona okungavunyelwe ukuba akudle ngenxa yokulawulwa yidlozi.
"Isibonelo nje yinyama yengulube ngeke ithwasa liklemuze ubhekeni yize umnandi ngoba liyalawulwa." kusho uVVO.
Noma-ke ukuzila singasakweyamanisi nesiko kuphela kukhona abaphila ngakho okubasizayo ekuxazululeni izinkinga zabo. Kuyenzeka ukuba umuntu ahlushwe yizitha angazazi bese ethatha isinqumo sokuba angadli ukudla ecela kuMdali ukuba amxazululele leyo nkinga ngempela kwenzeke.
Sithole ukuthi kuyingozi nokho ukuxabana nomuntu noma isihlobo sakho bese usizilela ukudla ngoba kawazi ukuthi isicelo sakho kwabakini nakuMdali siyokwemukeleka kanjani kubonakale ngesihlobo sakhe sesiphambana nemvula wena ubusizilele usacasukile. knowledge.simelane@ilanganews. co.za
Kokudliwa ngamathwasa kukhona okungavunyelwe ngoba elawulwa yidlozi.