SEBENZISA IKWINDLA NOBUSIKA UKUHLELELA INTWASAHLOBO
EKUXOXENI ngokulungiselela ukuphephisa izitshalo ekucekelweni phansi yizinambuzane nezilokazane, siqhakambisa ukuntshingela nokuzingela ensimini ukuze uqoqe ulwazi oludingayo ukwenza lo msebenzi.
Ngenxa yokuthi isimo sezulu nesimo semvelo kasifani ezindaweni ezehlukene, kanjalo nezinambuzane kanye nezilokazane ezicekela izitshalo phansi ziyahluka.
Sike sachaza ngokwedlule ukuthi kufanele umlimi omunye nomunye azijwayeze ukuntshingela nokuzingela ensimini ubusika nehlobo ehamba ehlola ukuthi kwenzekani ensimini.
Kuzoya ngendawo yangakini kodwa imvamisa phakathi kukaNhlaba (May) noNhlangulana (June) kuya kuNtulikazi (July) izilokazane eziningi zibeka amaqanda, njengamabhungezi asuke ezingela emasimini efuna ukudla nabalingani. Kuyothi ke emuva kuka Ntulikazi abesebeka amaqanda.
Kuzoya ngohlobo lwebhungezi kodwa ngokuvama amaqanda athatha ukusuka ezinsukwini ezine kuya kwezingamashumi amabili noma inyanga ukuze aphenduke abe amathuku.
La mathuku azodla izimpande zesitshalo esikhona ngaleso sikhathi lapho echamselwe khona, bese ebuyela esikhwameni sokuphepha emakhazeni. Kuyothi ngoMasingana (January) avu- mbuke futhi esefuna ukudla futhi ukuze ezokhula abe amabhungezi futhi.
Lokhu kubeka obala ukuthi uma ubona amabhungezi ngesikhathi esithile ensimini kumele ulindele ukuvakashelwa yimvukuzane njengoba bese sishilo ukuthi imvukuzane ithanda amathuku.
Ngesinye isikhathi mayinile imvula uzobona izingqumbana ezincane ezimanzi zomhlabathi ezingalingani kodwa nezingqumbi zemvukuzane. Lezi zingqumbana ziyinkomba yokuthi kukhona iminyundu ngaphansi komhlabathi.
Kanjalo-ke futhi uzobona emuva kwezinsukwana ezimbalwa sekukhona
ingqumbi yemvukuzane ngoba phela ilandela lokukudla okuyiminyundu.
Okusho ukuthi amavole nawo asezophangelana ezothatha amathuba okuguduza kulezizindlela ezimbiwe yimvukuzane bese efinyelela ezitshalweni ezithela ngaphansi eseshaya ebhuqa.
Ngesinye isikhathi uzothola izivemvane zijabulile zizindizela ensimini, nazo-ke izivemvane ziyizinhlobo zemindeni engafani kodwa imvamisa zidlula ezigabeni ezine ukuze zibe zindala kahle.
Ziqala ngokubeka amaqanda ngaphansi kwamaqabunga ezitshalo, zishintshe zibe yizibungu, zishintshe futhi zibe yiziphungumangathi ezizodla lamaqabunga, bese egcina eyizivemvane ezindala.
Isigaba esinye nesinye sibaluleke ngokwehluka, angithi iziphungumangathi kumele zidle ngempela ukuze zikwazi ukuphenduka sibe yivemvane elihle elikhulile elikwazi ukubekela amaqanda futhi ukuze impilo iqhubeke.
Umehluko wukuthi impilo yovemvane inomonakalo emaqabungeni esitshalo kanti eyebhungezi inomonakalo ezimpandeni zesitshalo.
Kanti futhi izivemvane zona zidliwa yiminyovu, izintuthane, ojekamanzi, izinyoni, izinkawu, nezinyoka namaselesele. Kusobala-ke ukuthi emuva kokulusa insimu wabona impilo ezovumbuka entwasahlobo unalo ithuba lokulungisa izikhali zokuhlomuhlasele ukuze uphephise izitshalo ekucekelweni phansi, noma-ke sinokugcizelela ukuthi kasikho isidingo sokushabalalisa sonke isizwe sezivemvane namabhungezi ngoba kunezilokazane ezizoshabalala ngenxa yephango bese kuvela igebe endalweni.
Uma ngabe umlimi edinga ukuchushiswa ngezinhlelo ezinemininingwane nemihlahlandlela angathintana nehhovisi lethu ngendlela ejwayelekile.