NGEKE ISAHLEHLISWA IMIDLALO KANSIMBI SANGWENI
NGEKE isahlehliswa iSiyabonga Sangweni Youth Celebration eshayisana nomdlalo wamanqamu weNedbank Cup ozokuba mhla zingama 24 kuNhlangulana (June) eMoses Mabhida Stadium, eThekwini.
Imidlalo kaSiyabonga “Nsimbi” Sangweni obeyisiqongqwane se-Orlando Pirates, iqala mhla zingama-23 isongwe zingama-25 kuNhlangulana eDondotha Sports Ground.
Le midlalo kayikaze ishayisane nemidlalo engaphansi kwePremier Soccer League (PSL) kwazise kumenywa abadlali abadlala kule nhlangano iningi labo ebelidlala noSangweni kwiPirates eqhathwe neLamontville Golden Arrows kwi- semi final yeNedbank Cup emdlalweni ozokuba seThekwini ngosuku olusazomenyezelwa.
USmanga Mgenge oyiMeya yaseMfolozi oyingxenye enkulu yemidlalo kaSangweni, utshele leli phephandaba ukuthi ngeke isahlehliswa imidlalo yize iqondana nowamanqamu weNedbank Cup.
“Siyakuqaphela ukuthi iPirates yenza kahle kwiNedbank Cup okuyinto engayifaka kowama- nqamu. "Uma kwenzeka ingena kowamanqamu sizocela abadlali abalimele noma abasezigwebeni zamakhadi ukuhambela imidlalo kaSangweni. Asikwazi ukungayimemi iPirates kulo mqhudelwano kwazise uSangweni uyintandokazi yabalandeli bale kilabhu njengoba besuka kuzona zonke izinkalo bezokweseka imidlalo yakhe.
“Lizokube liphezulu kakhulu izinga lalo mqhudelwano kulo nyaka njengoba siqhamuka nezinhlelo ezintsha minyaka yonke,” kusho uMgenge ngezinhlelo zikaNsimbi ongumfowabo omdala kaThami Sangweni ongukaputeni weChippa United.
IChippa nayo isethubeni lokungena kowamanqamu weNedbank Cup njengoba itonyulwe ekhaya kowe-semi final ezoyidlala neSuperSport United evikela lesi sicoco.