KUHLEHLE UMDLALO WE-SAFA NGABAFUNDI
KUCATSHANGELWE abafundi kuhlehliswa umdlalo weMaritzburg City neDrakensburg FC ngaphansi kweSouth African Football Association (Safa) KwaZulu-Natal ABC Motsepe League obekumele ugijinywe namuhla ngoLwesithathu eWadley Stadium, eMgungundlovu.
Lo mdlalo usuzokuba kusasa ngoLwesine ngo-13h00 kuyona le nkundla. La makilabhu anabadlali abafundayo. Avumelane ngokuthi ugijinywe kusasa ngoba abafundi bayagcina namuhla esikoleni njengoba kuzokuba nempelasonto ende. Lokhu kuqinisekiswe nguZakhele Gwala ongumdidiyeli walesi sigaba.
La makilabhu avumelene ngokuhlehlisa lo mdlalo ngoba vele sekucacile ukuthi ubhedu seludliwe yiThongathi ezomela iKwaZulu-Natal emidlalweni yokuhlungela ukungena kwiNational First Division (NFD).
Mibili kuphela imidlalo enamuhla ngoLwesithathu. I-GWP Friends iqhathwe neHappy Wanderers namuhla ngoLwesithathu ngo-12h00 eWorkington Grounds. IKwaDukuza FC izodudulana neMilford ngo-15h00 eStanger High.
Amacala asele kulesi sigaba azohlalelwa ngesonto elizayo. Phakathi kwamacala akhona ngelithinta iFriends ne-Ashley. Elinye liphakathi kweFriends neKwaDukuza bese kuba ngelemaJuba neThongathi.
Kuthiwa leli cala ngeke liyiphazamise iThongathi ngoba ibivakashele AmaJuba yafika enkundleni kudlalwa ikhilikithi. Kuthiwa umasipala waseMnambithi uyibhalele iSafa uqinisekisa ukuthi AmaJuba abeyibekisile inkundla, kwaba nokushayisana kwezikhathi. Isiyonke imidlalo yeSafa KZN ABC Motsepe League ngoMgqibelo ihlelwe kanje: EChristianenburg: Ashley vs KwaDukuza 12h00. EMoses Mabhida O/F: Gamalakhe vs Wanderers 15h00. ESettlers Park: UThukela vs Thongathi 15h00. EDondotha: Dundee Rangers vs Sobantu Shooting Stars 15h00. Osizweni: AmaJuba vs KwaMashu All Stars 15h00. EKing Zwelithini: Durban FC vs UMvoti 15h00. EWorkington: Friends vs Milford 12h00.