Umqeqeshi umincile ngonozinti ozohlinzwa
Uphuke isandla kwalimala nesitobha
UHAQWE yizinkinga zokulinyalelwa ngabadlali abamqoka umqeqeshi weReal Kings United obambe umoya nangonozinti wakhe ophuke isandla ngeledlule osemgqeni wokuhlinzwa.
IKings izobhekana nomkhaya iRoyal Eagles koweNational First Division (NFD) ngoMgqibelo ngo-15h00 eSugar Ray Xulu Stadium, eClermont, ngaphandle kancane kwasePinetown. Lo mdlalo uthathwa njengomkhulu kulesi sigaba njengoba la makilabhu engomkhaya.
Ngaphandle kwalokho, womabili asethubeni elihle lokungena kuma- play off okwenza ube nesasasa.
Kuzokhumbuleka ukuthi emlenzeni wokuqala obuseHarry Gwala Stadium, eMgungundlovu, bekuphume nesinedolo kodwa zagcina zibambene ngo1-1.
IKings yiyona ebone imbobo yepali kuqala kulo mdlalo.
Engxoxweni uSimo “Govuza” Dladla ocija iKings abe nayo neLANGA izolo ngoLwesibili ekuseni, ukhale ngonozinti wakhe, uMlungisi Mazibuko, ophuke isandla ngeSonto ezakhe ziguqisa iSantos ngo-2-0 koweligi eCape Town.
Lo mqeqeshi uthi kulo mdlalo kuphinde kwalimala uMahlatse Petsana oyisitobha naye ongeke abonakale kulo mdlalo.
“Amalungiselelo ethu siwaqale kabi, kuphuke unozinti wethu sidlala neSantos. UMazibuko ubenza ezibukwayo ezintini kule midlalo yethu eyedlule. Njengoba ngikhuluma nawe nje, usesibhedlela eCrompton, ePinetown, ulindele ukuhlinzwa.
"Siphinde salinyalelwa nguMahlatse okwenza izinto zethu zibe nzima kakhulu njengoba siya kulo mdlalo womkhaya.
“Kodwa-ke ukukhala kakhulu ngeke kungisize kufanele siwugijime lo mdlalo futhi siwunqobe.
"Bakhona abadlali baningi futhi bonke bakhombisa ukukulangazelela ukulwela ikilabhu,” kusho uDladla.
Limbuza leli phephandaba ukuthi njengoba ezakhe zibukeka zinethuba lokuya kuma- play off ngabe yinto ayibhekile yini leyo, uthe: “Lesi sigaba sibizwa nge- promotional league ngoba wonke umuntu udlalela ukungena kwi-Absa Premiership.
"Eyezembe thina kasikaze siyiphuphe ngisho silele. Njengoba nathi sibukeka sinalo ithuba lokungena kuma- play off nje, noma kanjani sizokulwela lokho, sizohluleka sizamile. Mancane kakhulu amaphuzu asihlukanise nekilabhu esendaweni yesibili sisengayibamba.
"Okumqoka nje kithina wukuthi singabheki abanye abantu sinqobe imidlalo yethu okunye kuzozenzakalela.
"Engikucelayo kulo mdlalo wethu ne-Eagles wukuthi abantu baphume ngobuningi babo ukuzoseseka.
"Ngiyathembisa ngeke bayikhalele imali yabo bazobona ibhola eliseqophelweni eliphezulu,” kusho uDladla.
Isiyonke imidlalo yeNFD engempelasonto iqhathwe kanje:
NAMUHLA NGOLWESITHATHU
ETsakane Stadium: Jomo Cosmos vs Black Leopards 15h00. NGOLWESIHLANU EParow Park: Cape Town All Stars vs University of Pretoria 15h00.
NGOMGQIBELO EThohoyandou Stadium: Black Leopards vs AmaZulu 15h00.
E-AFC Puma Rugby Stadium: Witbank Spurs vs Milano United 15h00.
E-NNK Rugby Stadium: FC Cape Town vs Jomo Cosmos 15h00.
E-Athlone Stadium: Stellenbosch FC vs Mthatha Bucks 15h00.
Kanyamazane Stadium: Mbombela United vs Santos 15h00.
ESugar Ray Xulu Stadium: Real Kings FC vs Royal Eagles 15h00.
NGESONTO EMhlathuze Sports Complex: Thanda Royal Zulu FC vs Magesi FC 15h00.