KUMAPEKETWANE E-METRO FM
KUBUKEKA sengathi kudingeka isiguqo esiphuthumayo eMetro FM njengoba lo msakazo ushiywa yinqwaba yokhilimu bawo ikakhulukazi emuva kokumenyezelwa kwezinguquko ekuqaleni kwale nyanga esiyiphothulayo uMbasa (April).
Nesiqubulo sayo (iMetro FM) esithi “Asikakaqedi” naso sibukeka siyiphendukele esiswini njengotshwala njengoba izolo kusabalale izindaba zokushiya “kwamawele” uLebogang Naves noSiphesihle Ngwenya abaziwa ngoDJ Naves noDJ Sphectacula noma iKings Of The Weekend (KOTW).
Laba benza uhlelo olunesasasa kakhulu ngoMgqibelo kusihwa olubizwa nge-The Preparty phakathi kuka-6 no-8.
Nakuba izizathu zigcine zingavelanga kwaze kwashaya isikhathi sokushicilela kodwa kuke kwavela phambilini ukuthi bebengasathokozile, bekhala ngokushiywa ngaphandle uma sekushintshwa izinhlelo, nakuba kusuke kukhona izikhala ezivulekile.
Ezinkundleni zokuxhumana izolo ubelokhu ebonge njalo uNaves kubantu abebebafisela okuhle ohambeni lwabo olusha kodwa uzakwabo ubengagqamile kangako ekuphawuleni.
Iphunzile yonke imizamo yokuthola abanikazi bendaba njengoba ophendule ucingo ehhovisi ababhukhwa kulo engakwazanga ukukhipha imininingwane, ethi akekho emsebenzini namuhla (esho izolo), wathembisa ukubanxusa labo DJ ukuba bafonele iphephandaba kodwa dololo.
Ngale kokusebenza ndawonye eMetro FM kusukela ngo-2010, banamanye amabhizinisi abawenzayo okungelokuthutha abantu abaqavile uma kunemicimbi, ukudijeya ndawonye emicimbini, ukushayela uhlelo lokuvundulula ikhono koDJ kumabonakude oluthi 1’s and 2’s abalusungule ngowezi-2014. Badume kakhulu ngengoma abahlukanise ngayo unyaka phambilini enezinhlamvu ezithi “Ngicishe Ngafa, abantu abangaka”.
UNkz Vuyo Mthembu osebenza emnyangweni wezokuxhumana eSouth African Broadcasting Corporation (SABC) ukuqinisekisile ukuthi nebala kuyaphela ngeKings of The Weekend neMetro FM.
Unqabile njengokujwayelekile ukusho izizathu zokwehlukana kwenhloko nesixhanti.
“Bazogcina kule mpelasonto (yakusasa) ukuzwakala emoyeni kodwa ngeke ngikwazi ukudalula imininingwane ngokuphela kobudlelwano,” usho kanje kafushane.
Belukhala luze lube nesibibithwane ucingo loMphathi weTouch HD, uMnu Martin Vilakazi, njengoba bese kusabalele izinsolo zokuthi nabo labo DJ amabombo bawabhekise kulo msakazo kaTbo Touch.
Kuzokhumbuleka ukuthi ethula lesi siteshi sakhe uTouch walibeka ngembaba elokuthi usazoyiklinya iMetro FM ize ithi tswiyo tswiyo, njengoba eyisola ngokuthi kayimnikanga nethuba nje lokuvalelisa. Kuzokhumbuleka futhi ukuthi naye uVilakazi obephethe yona le Metro FM phambilini, ukhishwe isikhishwa kanjani.
Phakathi kwababhale ku-twitter nabaphendulile uNaves yilaba: SOUL, @ArnieSoul: @SPHEctacula @DJNAVES go well gentlemen. All the best for your new adventures #KOTW Scrumptious_Lindi?, @ Eralicious_L: HAIBO!! Ngeke niyahamba KOTW @DJNAVES @ SPHEctacula, I just don’t get it. I think we should have a petition NGEKE PHELA who will be hot as yoll?