Qonda kabanzi izexwayiso ezikhonjiswa kumabonakude
SEKUKANINGI uma ubuka umabonakude uqaphele le mibhalo ethi "PG", "SNL", noma "PG 13" neminye eyizexwayiso ezihambisana nalowo mdlalo noma uhlelo olusuke lukhonjiswa.
Ngithe kulokhu make ngikhulume ngalezi zexwayiso esizibona kumabonakude nsuku zonke ngoba abanye bethu abaziqondi ukuthi zisho ukuthini.
Mhlawumbe mangiqale ngokusho ukuthi baningi phakathi kwethu abayibonayo le mibhalo kodwa abangakugqizi qakala ukuthi ngabe ichazani.
Masiqale la - kukhona ibhodi eyengamele okukhonjiswa kumabonakude ebizwa ngokuthi yiFilm and Publication Board (
Ngiyazi abantu bajwayele ukubona uphawu oluthi "FBP" kodwa-ke futhi abanye baye bangaqondi ukuthi lisho ukuthini. Namhlanje-ke usuyazi, ngeke uphinde ubhayiziseke ngalokhu.
Le bhodi yiyo ebhekele ukuthi yini ekhonjiswayo kumabonakude futhi iqinisekisa ukuthi imigudu nemithetho yokusakaza ilandelwa ngendlela efanele yini.
Ibheka nezexwayiso ezihambisana nemidlalo kanye nezinhlelo ezikhonjiswayo ukuthi ziyafakwa yini ngendlela efanele.
Uma umdlalo ubhalwe ukuthi "PG", okusho ukuthi "Parental Guidance", le bhodi liqinisekisa ukuthi abahleli nabaqondisi bomdlalo bayayilandela imithetho eqondene nalokhu.
Yize lingenzi isiqiniseko sokuthi emakhaya ziyalandelwa yini lezi zexwayiso kodwa liyaqinisekisa ukuthi ukuvezwa kumabonakude kuyikho yini, futhi zibekiwe yini ezexwayiso ezifanele. Lezi zexwayiso kufanele zivele ngaphambi kokuba umdlalo noma uhlelo luqale.
Kuvamisile ukuba le midlalo noma izinhlelo ezibalwe o"SNL" (Sex, Nudity & Language) ingakhonjiswa nhlobo kumabonakude kodwa ivamise ukubonakala kumacinema lapho kwaziwa khona kahle ukuthi kuzobe kubuka abantu abadala ngokwanele njengoba lolu phawu lusho ukuthi kunezithombe zocansi, yizithombe zabanqunu, nenhlamba.
U-"PG 13" usho ukuthi abazali mabaqaphele izingane ezineminyaka engaphansi kwengu-13 kanjalo kanjalo.
Isizathu sokuba ngibhale ngalokhu bengifisa nje ukuba kule ngosi sifundisane izinto ezithize ezibalulekile kumabonakude, esingavamisile ukuzinaka.
Izingane ziye zizithole sezibuka izinto ezingafanele ngenxa yokuthi abazali abazinaki lezi zexwayiso.
Ngeledlule ngike ngavakashela ngomunye wabahlobo bami abasezindaweni zabadla izambane likapondo. Okungihlabe umxhwele kulo muzi yindlela izinto ezihleleke ngayo.
Kuthe kungena Isibaya, kwathiwa izingane maziye kwelinye ikamelo lapho bezivulelwe khona umabonakude odlala opopayi.
Uma ngibuza kumzali ukuthi kungani beziyisa kwelinye ikamelo izingane, wathi yingenxa yokuthi isexwayiso kulo mdlalo sikhomba ukuthi abantwana bangaphazamiseka ngezinye zeziqephu ezingafanele ukubonwa abantwana.
Ngivele ngabona ukuthi uma sonke singakuqikekela lokhu singakhulisa abantwana abakuqondayo konke okwenzeka kumabonakude.
Masibheke ukuthi uthini umabonakude, siqaphele izexwayiso, singabukusi abantwana bethu okungafanele bakubone.
Le bhodi yiyona ebhekele ukuthi okukhonjiswa kumabonakude...