Kudliwe imali yokwakha isikole
EZEMFUNDO: Nezigebengu seziyazenzela
SESIQEDELWA ngokupatanisa isikole saseNgonyameni eNgwavuma, enyakatho-mpumalanga yeKwaZulu-Natal esiqale ukwakhiwa ngonyaka wezi-2011 okusolakala ukuthi kudliwe imali yokusakha.
ILubelo High School - eqanjwe ngeNkosi yakwaMngomezulu kuleya ndawo - inenqwaba yezingane ezimpintshanayo emakilasini ngenxa yokungapheli kwamanye asakhiwa.
ILANGA lithole ukuthi iRav’s Building and Maintenance (Pty) LTD, kaMnu Don Munien, yiyona ethole lo msebenzi - obekukhishwe u-R11 million ngawo - kodwa yahluleka yancama ukuhlangabezana nomnqamlajuqu wokusiqeda njengoba bewungonyaka wezi-2012.
Kuthiwa njengamanje izi-sebenzi ezifaka ugesi nezipenda isikole, zihleli esikoleni zibulawa yindlala ngoba kaziholile.
Kubikwa nokuthi izigebengu ziyangena zebe impahla yesikole ngenxa yokuthi kasikabiywa - kwazise ukubiywa kwaso kuyi- ngxenye yomsebenzi wethenda enikwe iRav’s Building.
Induna yakule ndawo, uMnu Zenzele Shongwe, ithe ize yasebenzisa imali yayo ukupha izisebenzi ukuze zidle ngoba zingaholile.
"Abanye sibasize ngokubosela ummbila ukuze badle ngoba indlala isibaqedile. Ngikhiphe u-R200 wami ngoba ngisibona isimo ukuthi sibi. Okubi-ke manje wukuthi izigebengu sezingena ngaphakathi zebe impahla ngoba onogada bathi ngeke bagade ngoba kabaholelwe," kusho uMnu Shongwe.
Usihlalo wesigungu esilawula isikole, uMnu Jimson Mbhamali, ukuqinisekisile ukuthi emhlanganweni wethimba ebelithunyelwe nguNgqongqoshe wezeMfundo KwaZulu-Natal, uMnu Mthandeni Dlungwane ngoNhlolanja (February), kuvele ukuthi imali isiphelile, sekungaba nzima ukuqasha enye inkampani ukuba iqedele lo msebenzi.
UMnu Scelo Khuzwayo, okhulumela uMnyango wezeMfundo, uthi benza ngawo wonke amandla ukuba isikole siqedelwe ukuze abafundi bezohlala kahle emakilasini. Uvumile ukuthi kuvelile emhlanganweni abebenawo kulesi sikole nezinhlaka ezithinteka ekwakhiweni kwaso ukuthi imali kayisanele ukuba siqedelwe.
"Siqhubeka nophenyo lwethu ukuze sibambe labo abathinteka enkohlakalweni bese bebhekana nengalo yomthetho. Ungqongqoshe ukhathazekile ngesimo sabafundi bakulesi sikole abangasakwazi ukufunda kahle ngenxa yokungaqedwa kwamagumbi okufundela," kusho uMnu Khuzwayo.
Eziphendulela uMnu Don Muniem, ongumnikazi weRav’s Building and Maintenance, uthe bacele umnyango ukuba ubalulele isikhathi sokuqeda - kuze kube yile nyanga - ngoba usemningi umsebenzi osasele. Uphikile ukuthi kunezisebenzi ezingaholile. "Ngokwazi kwami zonke izisebenzi ziholelwe nempahla yokwakha iyeza. Izisebenzi eziningi bezingekho esikoleni ngoba bekungamaholidi kodwa umsebenzi uzophela ngokushesha," kuthembisa yena.