Umgadli weChiefs uphendlelwa e-Europe
Usephenduke ifenisha yoqobo eziMpofaneni
UKHONJWA e-Europe umgadli weKaizer Chiefs otshelwe ukuthi ngeke ivuselelwe inkontileka yakhe nale kilabhu kwazise akekho ezinhlelweni zikaSteve “Mphathi” Komphela ongumqeqeshi.
Inkontileka kaSiphelele “Shaka Zulu” Mthembu ongumgadli weChiefs iyaphela uma kusongwa le sizini. Lo mdlali usefana nefenisha kule kilabhu yaseNaturena njengoba isikimu engasitholi nhlobo. Nokho uke wafakwa ohlwini lwabadlali abachithwayo kwangathi iBloemfontein Celtic iyamthatha kodwa kwagcina kungalunganga.
ILANGA lihletshelwe ngumthombo walo ongaphakathi kwiChiefs ukuthi lo mgadli uma kuphela isizini angase alibhekise e-Europe. Kuthiwa kunamakilabhu aKwaIsrael nawaseCyprus amufunayo. Amakilabhu akula mazwe ajwayele ukusayinisa abadlali asebebheke empeshenini, asebephelelwe wushatini emaligini amakhulu.
“UMthembu angase azithole edlala e-Europe ngesizini ezayo, kunomuntu waKwa-Israel oyi- agent omhlanganiselayo. Kunamakilabhu akhona Kwa-Israel naseCyprus akhombisa ukumthanda. Kodwa konke kuzocaca ngokuphela kwesizini ngoba akasazimisele ngokudlala kuleli ufuna ukushintsha umoya,” kusho lo mthombo.
Imizamo yokuthola uMthembu kayiphumelelanga njengoba ucingo lwakhe belukhala kodwa lungabanjwa.
UBobby Motaung oyiMenenja-jikelele yeChiefs, uthe akanalwazi ngalolu daba.
“Isimo sikaMthembu niyasiqonda ukuthi simi kanjani kwiChiefs, kungenzeka ukuthi bazikhulumela naye ngqo. Vele unelungelo lokukwenza lokho, umthetho uyamuvumela ukukhuluma nanoma iyiphi ikilabhu emfunayo. Kodwa kanginalo ulwazi ngamakilabhu amfunayo,” kusho uMotaung.
UMthembu ufike ngelikhulu ishodi ebholeni ebangwa yiChiefs ne-Orlando Pirates okwenze kwalindelwa imilingo yodwa kuyena kodwa lutho. Udlale kuzona zombili lezi zinkunzi zaseSoweto.