Umangaze abaningi uJaiva Zimnike
UHLANYISE izihlwele umculi kamasikandi uMzovukile “Jaiva Zimnike” Khanyeza emcimbini kamasikandi obuseCurries Fountain eThekwini ngoMqgibelo kwiNqokotho Music Festival enza obekungalindelwe izibukeli.
Lo mculi utheleke ehambisana nentokazi yaphesheya kwezilwandle ezweni laseGerman uNkz Karin Kedem okhulume isiZulu kwachazeka izihlwele esebonga ukuba yingxenye yale ndumezulu yomcimbi.
UJaiva ubenandisa esiteji ecula ingoma akayiqophe noKarin ethi “Lihle” ekwialbhamu esihloko esithi “Inkosi Yomasikandi” ephume kuZibandlela (Nyakenye). UKarin ubecula ngolimi lwangakubo kodwa lokho kuthokozise abaningi njengoba bekungokokuqala ngqa ukubonakala kwakhe esiteji beyicula bukhoma lengoma yabo.
Utshele izihlwele ukuthi uyajabula ukufika kuleli zwe nokubona abantu bejabulela umculo. Ukuhlanyisa kwabo izihlwele kuthathe ngisho umsakazi woKhozi FM uNgizwe Mchunu obephethe uhlelo wancoma uJaiva ngomsebenzi wakhe kwezomculo. Umemezele wathi kuzoqopheka umlando namhlanje ngoba uJaiva uzongena nomlungu wakhe.
“Umlungu unezihlwele okudlula ngisho amavukane kamasikandi,” kusho uNgizwe.
Ngale kwezidubedube ezenzeke emcimbini sekungasemaphethelweni kodwa ukuhleleka kwawo bekusezingeni eliphezulu kakhulu okubalwa izindawo zokuhlala izicukuthwane, ukukhokhelwa kwamaciko nokunye. Abaculi bebengama-29 sebebonke okungezinye zezinto ezithokozelwe kakhulu.
UKarin uthi unothando lomculo kamasikandi, uqale ukuwuzwa edlalwa kudlwa izingoma zikaJaiva kade evakashe kuleli nakuba ebengawuzwa umyalezo wengoma. Echaza ngalokhu uJaiva uthi ujabule kakhulu ebona kwemukelwa uKarin ngalolu hlobo. Uveze nokuthi basazoqhubeka nokwenza omunye umsebenzi.
“Kuyisifiso sami ukuthi nangokuzayo siphinde sibonakale naye ebantwini. Nokuhlanganisa nje izilimi ezehlukene kusho into enhle,” kusho uJaiva.
Kulo mcimbi bekuboshelwe uSomnandi, Amageza, DSD, Qhosha, Mkhathazi, Mroza, Bonakele, Buselaphi, Shwi noMtekhala, Mjikijelwa, iGcokama Elisha, Khuzani, Abangani Bakhe, Bahubhe, Sgwebo sentambo, Sgabiso, Mnikezwa nabanye abaningi.