EZESIMANJE:
CISHE baningi abazali okuthi uma bebuka izingane zabo zingcofoza omakhalekhukhwini basho ngenhliziyo bathi “ukube ngangazi ngangingeke ngiyithenge le phone”.
Njengoba kade kunamaholidi nje, iningi labazali belikhala ngezingane ezihlale zinkonkoshele omakhalekhukhwini, izitsha ziduve kosinki, indlu ingashaneliwe negceke lenile kodwa lutho ukusukuma zitatazele.
Kunalokho ubona ziphusha noma zicijisa imilomo ( pout), zivala ubuso ngezandla - okuyimikhuba eyenziwa kuthathwa amaselfie.
Phela izingane zanamuhla kazisafani nathi, thina esasigcwala izintuli usuku lonke sidlala ushumpu, umagalobha, amathini noma izimabuli. Uma zingekho phambi kukamabonakude, zikutshele ngokuthi yini ezolandela esiteshini esithile ngasikhathi sini, uzithola zingcofozana nomakhalekhukhwini.
Yebo, izikhathi sezishintshile kanti nezinga lezobuchwepheshe selithuthuke kakhulu kodwa konke lokho kakusho ukuthi makungabe kusachithwa isikhathi ndawonye kuxoxwe umlomo nomlomo njengomzali nengane. Njengomzali kukhona isikhathi la uke ufise khona ukuxoxa nengane yakho, ubuze ukuthi kwenzekani esikoleni, ifisa ukufundelani uma iqeda isikole noma mhlawumbe icabangani ngezinto ezithile.
Okucacayo wukuthi akuselula kwabanye abazali ukuhlala nje nezingane zabo baxoxe - isikhathi esiningi sidliwa yibo omakhalekhukhwini.
Le genge encane kayigcini kuphela ngoku- chatter komakhalekhukhwini, kwesinye isikhathi uthi uyafona luke luzitshwe ucingo lwakho, mhlawumbe uthole ukuthi umuntu umatasa, uya- chatter.
Uthi uma ubuza umuntu akutshele ukuthi beluku- silent noma ku- vibrate. Kuyenzeka futhi uthi uma ungena enkundleni yekuxhumana iWhatsApp, nokuyilapho bengapheli khona, uthole ukuthi ingane yakhona i- online, imatasa iyazixoxela nabangani bayo.
Awube usazi noma nguwe onesidina noma inqena ukuxoxa nawe yini.
Indaba yokuthi kumele noma kakumele yini ithengelwe ingane ucingo kuyinto esingeke sisayixoxa kwazise siphila esikhathini lapho sidinga ukuhlale sixhumana ngaso sonke isikhathi. Ukuthi uyithengela isineminyaka emingaki ucingo kuba yisinqumo somzali.
Ezinganeni ezihamba ngezimoto zomalume ukuya esikoleni noma ezifunda ezikoleni ezikude kusemqoka ukuba zibe nomakhalekhukhwini ngoba kuyenzeka umalume angayilandi noma afike sekwedlule isikhathi.
Uma kungekhona lokho, kuyenzeka ihlushwe yizinto zokuhamba uma ihamba ngamatekisi bese kudingeka ukuba nixhumane. khukhwini banemithelela engemihle ezinganeni ngokomoya ( emotional), emsebenzini wesikole nasekuxhumaneni kwazo nabanye abantu.
U-80% wezingane kuthiwa zigxile kakhulu komakhalekhukhwini
U-70% uma uvuka ekuseni uqala ngokuqalaza ucingo.
U-60% awukwazi ukuphila ngaphandle kukamakhalekhukhwini
U-55% usebenzisa ucingo ngisho usendlini encane noma udla, nokusabalalisa amagciwane.
U-78,5% uphambana ingqondo uma udukelwe wucingo.
U-20% usuke wantshontsha imali ngoba ufuna ukuthenga i- airtime noma i- data.
U-10% usuke wasebenzisa umakhalekhukhwini ukushutha izithombe ezinqunu. Lolu cwaningo luphinde lwathola ukuthi izingane zihlehlisa isikhathi sokwenza umsebenzi wesikole futhi zibe nenkinga yokulala ngoba zihlala kuze kwedlule isikhathi komakhalekhukhwini.