IKHUNGETHWE YIZINKINGA IKINGDOM STARS

ISHAYWA wukungasitholi isikhathi esanele sokuziqeqesha ndawonye iKingdom Stars emele iKwaZulu-Natal kwiBrutal Fruit Netball Premier League.

IStars izotholana phezulu nezingqwele zanyakenye iCrinums ngoMgqibelo ngo-18h00 eCape Town. Le midlalo iqale ngenyanga edlule eThekwini, njengoba isifudukele eCape Town kanti eyandulela eyamanqamu neyamanqamu izokuba seBloemfontein ngoNhlangulana (June).

IMenenja yeStars, uPhindile Thusini, itshele ILANGA ukuthi banenkinga yokungakwazi ukuziqeqesha ndawonye kwazise abadlali abaningi bayasebenza. Uthi bazogibela ngawo uMgqibelo ekuseni okuzokwenza abadlali bafike bekhathele eCape Town ukulungiselela umdlalo ozokuba kusihlwa.

“Kunzima ukuhlanganisa abadlali ngenxa yokuthi bahlala kude abanye bayasebenza. Nginethemba lokuthi sizokwenza kahle ngoMgqibelo ngoba nayo iCrinums izinto kaziyihambeli kahle.

Okuhle wukuthi uzokube ekhona uPrecious Mthembu (ongukaputeni) obengekho ngeledlule ngenxa yomsebenzi. Esikwatini sabadlali abali-15 sizohamba nabali-12, abagadli abane, abasesiswini abane nezitobha ezine,” kusho uPhindile.

IStars emidlalweni emithathu inephuzu elilodwa njengoba ihlulwe kwemibili yadlala ngokulingana kowodwa kanti iCrinums kayikaze inqobe ngisho owodwa umdlalo. Isiyonke imidlalo yeBrutal Fruit Premier League imi kanje: KUSASA NGOLWESIHLANU ECape Town: Baobabs vs Fireballs 18h00, Flames vs Jaguars 20h00.

Aloes vs Stings 12h00, Baobabs vs Jaguars 14h00, Flames vs Sunbirds 16h00, Crinums vs Stars 18h00.

Diamonds vs Fireballs 10h30, Aloes vs Crinums 12h30.

ISITHOMBE NGABE: GALLO IMAGES ULOUISA Leballo uzozama ukuvikela isicoco sakhe kwiWomen Spar 10km Challenge ngoMgqibelo eBhayi.

ISITHOMBE NGABE: GALLO IMAGES UNOGAZI nakubalandeli uPrecious Mthembu ongukaputeni weKingdom Stars ezolibangisa eCape Town ngoMgqibelo ukuyodlala kwiBrutal Fruit Netball Premier League.