Ulahle imali emgqonyeni uNsimbi
Idliwe yizembe ikilabhu ayithenge kuqala isizini
UFAKE imali emgqonyeni kadoti uSiyabonga “Nsimbi” Sangweni ngokuthenga iDundee Rangers edliwe yizembe kwiSouth African Football Association (Safa) KwaZulu-Natal ABC Motsepe League.
Le kilabhu efudukele eDondotha, eMpangeni, ngakubo kaSangweni ngokuqala kwesizini, igingqele iMilford izolo ngoLwesithathu.
Iye kulo mdlalo ivele isigencwe yizembe njengoba ingene ensimini inamaphuzu ali-19. Ukugencwa yizembe kwezikaNsimbi kuqinisekiswe nguZakhele Gwala onguMdidiyeli walesi sigaba esifundazweni.
USangweni uthenge le kilabhu ngemuva kokubeka amakhokho ethala njengoba kade eyinsika yeOrlando Pirates ayisize yanqoba izinkomishi ezimqoka.
Kule sizini izembe kumele ligence amakilabhu amathathu ukuze kuzogijima ali-16 ngesizini ezayo.
IGamalakhe United isendaweni yesithathu ukusuka emsileni ngamaphuzu angama-23 kanti iKwaMashu isendaweni yesibili ngama- phuzu angama-25. Kusenecala elithinta iGamalakhe neKwaMashu okulindeleke ukuthi lihlalelwe ngesonto elizayo.
Uma kwenzeka iThongathi ezomela isifundazwe emidlalweni yokuhlunga inyukela kwiNational First Division (NFD), kukhona ikilabhu eyodwa ezosinda ukudliwa yizembe kwiMotsepe, kodwa uma ibuya ilambatha, kuzophuma womathathu asemsileni.
Ikilabhu kaSangweni idliwa yizembe nje, phambilini ubevele eneDondotha All Stars ebidlala kwiSAB League. IDundee isiyogijima kusona lesi sigaba. Imidlalo yokugcina yeMotsepe League izogijinywa ngoMgqibelo nangeSonto kanti kuyona yomibili kuzokube kudlala iKwaDukuza United ezicelele ukuqhathwa ngalolu hlobo emuva kokubanjezelwa yiNedbank Cup. NgoMgqibelo ngo-12h00 izodlala neSobantu Shooting Stars eStanger kuthi ngeSonto ngo15h00 ibhekane neMvoti FC eKing Edward.
Amatimatolo 4, AmaJuba 2; Dundee 2, Milford 0 (kugingqiwe); KwaMashu 3, Sobantu 2.