SELUPHETHWE ISIGUNGU SE-ANC OLWASEMDONI

SELUSEZANDLENI zesigungu se-African National Congress (ANC) KwaZulu-Natal udaba lomkhonyovu okubikwa ukuthi udla lubi kuMasipala uMdoni, eningizimu yeKwaZulu-Natal osekuholele ekubeni imeya, uMnu Thabani Dube, inikwe umnqamulajuqu wezinsuku eziyisi-7 ukuba inikeze imenenja kamasipala ikhefu eliyisipesheli nokuba usomlomo, uMnu Siyabonga Khwela, esule emsebenzini.

Kwenzeka lokhu nje, ILANGA libike ukuthi kunenkohlakalo ethinta imenenja, uMnu Xolani Luthuli. UMnu Luthuli usolwa ngokuthi uqoka izinkampani asondelene nazo ngemali engaphezulu kwaleyo umasipala ayihlinzekele izinhlelo ezithile zentuthuko okubalwa kuzona ukwakhiwa kwemigwaqo nokuba kulahleke izizumbulu zemali kamasipala kodwa kwacweba iziziba nje.

ILANGA lingakudalula ukuthi indaba iqale emuva kokuba kuthiwa uMnu Luthuli unikeze izinkampani ezimbili, iKulu Civils & Project Managers ne-Egxeni Engineering Construction imisebenzi yokwakha imigwaqo emibili iGqolweni neNkombe ngemali engaphezulu kwesabelo ebesihlinzekwe wumasipala.

Kubikwa ukuthi umasipala ububeke u-R10 million ngale migwaqo, umunye ubuzohlinzekwa ngo-R5 million kodwa izinkampani kuthiwa zigcine ziqokwe ngemali engaphezu kuka-R23 million.

I-Egxeni Engineeering Contruction iqokwe ngo-R 14, 592, 000.00 mhla zili-13 kuMasingana (January) ukwakha iNkombe kanti iKulu Civils and Project Managers iqokwe ngo-R 9,651,151.55 mhla zili-16 kuMasingana (January) nonyaka ukwakha iGqolweni.

Kuvela ukuthi uMnu Luthuli wehlulekile ukuchaza ukuthi le nto yenzeke kanjani. NgoLwesibili amakhansela aseMdoni nobuholi be-ANC esifundeni iLower South Coast, babizelwe ehhovisi lesigungu se-ANC esifundazweni kwakhishwa umyalelo wokuba uMnu Dube anikeze ikhefu eliyisipesheli uMnu Luthuli ukuze uphenyo lungaphazamiseki.

Okwenza kuthiwe uMnu Khwela makasule, wukuthi uvumele umhlangano wamakhansela ongagunyaziwe obumhla zingama-21 Mbasa (April) ukuba umise uMnu Luthuli. Lokhu kuthiwa kuthathwe njengobudedengu obucishe bafaka umasipala ezindlekweni zenkantolo.

Kunemibiko ethi uMnu Khwela uchithwa kumasipala nje, yingenxa yengcindezi yokuthi uyinkukhu nempaka noMnu Dube. Umnqamulajuqu onikwe imeya usho ukuthi namuhla ngoMsombuluko kumele kube nomhlangano ophuthumayo wesigungu sikamasipala kuhlonishwe umyalelo wesigungu se-ANC esifundazweni.

UNobhala we-ANC KwaZuluNatal, uMnu Super Zuma, uthi impela bahlanganile namakhansela aseMdoni ngenxa yezinxushunxushu ezibikwayo, kodwa akathandanga ukuveza izinqumo ezithathiwe.

"Ngiyafisa ukuba lokho sikhulume kakhulu ngako uma isigungu sikamasipala sesithathe isinqumo ngokwenzekayo laphaya kodwa zikhona izinqumo esizithathile zokuqondisa izigwegwe kulabo abasifake ehlazweni," kusho uMnu Zuma.

Uvumile ukuthi kulezo zinqumo kukhona nesokuba uMnu Luthuli ahlabe ikhefu ukuze kungaphazamiseki uphenyo. UMnu Dube wale waphetha ukukhuluma ngezinqumo nokubizwa kwabo yisigungu seANC KwaZulu-Natal.

"Kangazi lutho ngezinqumo mayelana nosomlomo nemenenja yami, engikwaziyo nje wukuthi bayasebenza ngokujwayelekile futhi uma kukhona ushintsho ngabo ngiyo-kwazisa," kusho uMnu Dube.

Uphikile ukuthi yena noMnu Khwela kabezwani. UMnu Khwela akaphikanga ukuthi utsheliwe ukuba esule. Ubonge ubuholi beANC ngethuba obumnikeze lona njengoba eke waba yimeya futhi kulo masipala.

"Ngale kwalokho, ngiyohlala ngiyilungu elithembekile le-ANC," kusho uMnu Khwela.

Ngiyafisa ukuba lokho sikhulume kakhulu ngakho uma isigungu...