Kwethuke umphakathi kubulawa obeyibamba
Ubephuma emngcwabeni
SIGUTSHUZELWE yifu elimnyama isizwe sakwaCele eNgonyameni, eningizimu yeTheku emuva kokudutshulwa kubulawe uMnu Bhekisisa Cele obeyibambabukhosi.
UMnu Cele obebambele iNkosi Vukani Cele ephethe njengamanje ubulawe sekuhwalele ngoMgqibelo khona eNgonyameni okuyisigameko esethuse abantu bakuleya ndawo kwazise kakucaci noma indaba inombango wesikhundla sobukhosi okuvela ukuthi usenkantolo kuyimanje.
Kuthiwa uMnu Cele ubehleli nabangani bakhe ngesikhathi kuqhamuka amadoda angaziwa aqonda kuyena maqede avulela ngenhlamvu, ngaphandle kokuthi aze athi vu.
Umufi ushonele endleleni ebheke esibhedlela.
Ilunga lomphakathi ebelikhona kwenzeka lesi sigameko - elicele ukungadalulwa ngezizathu zokuphepha - lithi lesi sigameko senzeke uMnu Cele esanda kubuya emngcwabeni. Udlule komunye umuzi nabangani bakhe ngenhloso yokuyocima ukoma njengoba emini ilanga belikade lishisa likhipha umkhovu etsheni.
“Bekusanda kushaya ihora lesithupha sibuya emngcwabeni khona lapha endaweni. Ngesi- khathi kusahleliwe kungonakele lutho, kuqhamuke amadoda amabili angaziwa aqonda kuyena uCele angakhuluma lutho, avulela ngenhlamvu ebhekise kuyena. Yize ngingawabonanga la madoda ngoba kukhona ebengisakwenza, ngisizwile isibhamu siqhuma kaningana.
"Ngiqhamuke sebebalekile laba bantu uCele eselele phansi engasanyakazi. Simthathile samphuthumisa esibhedlela kodwa sithe sisendleleni sabona ukuthi akasekho, kangangoba size samthinta sifuna ukuzwa ukuthi usaphefumula yini.
"Ibuhlungu indlela abulawe ngayo uCele kanti kasiyazi nembangela yokubulawa kwakhe” kusho leli lunga lomphakathi.
Ilunga lomndeni wakwaCele nalo elicele ukungadalulwa ngoba lesaba ukuhlaselwa - lithi uMnu Cele ubengumuntu obewuthanda umndeni wakhe futhi engakaze awubikele ukuthi kukhona izinsongo azitholayo.
Lithi ngeke bakwazi ukuqagula ukuthi ngabe ubulawe ngubani ngoba ubengenazo izitha futhi ubengumuntu wabantu.
“Siwumndeni sigqemeke engeqiwa ntwala ngokubulawa komfowethu ngale ndlela. Ubengumuntu onomusa futhi ewuthanda umndeni wakhe. Ngicabanga ukuthi ukuba kukhona izinsongo abezithola, ubezosazisa ngoba usibikela njalo uma kukhona okungamphethe kahle noma enenkinga emndenini. Konke sesizokubeka ezandleni zamaphoyisa ukuze kuzoboshwa abenze lokhu.
UMnu Msawakhe Mayisela okhulumela uMnyango wezokuBu-
Konke sesizokubeka ezandleni zamaphoyisa ukuze kuzo...