Benqaba nempesheni yesalukazi
Bathi besintshontsha imali kahulumeni, sikweleta u-R24 000
SILALA sibala izinkanyezi isalukazi saseZamazama, eMboza, KwaMhlabuyalingana, enyakatho-mpumalanga yeKwaZulu-Natal esingakwazi ukuthola imali yempesheni yize iminyaka yaso isifike yaze yedlula kwebekiwe.
UNkz Nomvula Tryphina Manzini (67), uhlala endlini encane efulelwe ngotshani obudala - osekucaca ukuthi kufanele ngabe sebuyashintsha.
Uthi uhlala nabazukulu abayisi-6 bonke abayizintandane. Bonke balala kule ndlu.
Kufanele ngabe uqale ukuthola imali yempesheni ngowezi-2010 kodwa kuze kube yimanje lutho.
Usola izisebenzi zeSouth African Social Security Agency (Sassa) ngokumenza inhlekisa uma eyozama ukuthola usizo. Uma eya emahhovisi akwaSassa eManguzi, enyakatho-mpumalanga yeKwaZulu-Natal, izisebenzi ziyaye zilokhu zikhombisana ngaye.
Utshele ILANGA ukuthi eminyakeni edlule naye udubile nabanye abaningi bayobhalisela imali yesibonelelo sezingane kodwa bengenazo. Ngesikhathi kuphuma umyalelo othi bonke abaholela izipoki mabayozesula, ukwenzile lokho. Uthi okumephula umphefumulo wukuthi kuthiwa ngeke ayinuke imali yempesheni ngoba ubentshontsha imali kahulumeni - kodwa ayenabo ngesikhathi beholela izipoki, bayayithola impesheni.
“Kubuhlungu okwenzeka kimi. Njengoba ubona nje ngilala lapha ngibala izinkanyezi.
"Ngenxa yobuhlungu bempilo engiyiphilayo, sengiyazisola nokuthi ngavumelani ukuyokwesula izipoki engangiziholela. Abazukulu laba engihlala nabo kabanabani ozobasiza ngaphandle kwami. Ngomunye unyaka ngifike emahhovisi eManguzi bangitshela ukuthi kuzofanele ngiyikhokhe yonke imali ebengiyihola ngokungemthetho. Ngivumile ukuthi ngizoyikhokha ize iphelele.
"Emaphepheni engibhalelwe wona kuthiwe ngikweleta u-R24 000,00. Ngizamile ukuchaza usizi lwami lokuthi anginayo indlela yokwenza imali. Ngicele ukuba bangibhalise ngithole eyami yempesheni ukuze ngizothatha ingxenye ngikhokhe ngayo,” kusho yena.
Ikhansela lendawo, uMnu Johnson Gwala, lithe lizohamba liyombona uNkz Manzini emuva kwalokho liqale indlela angasizakala ngayo.
“Ibuhlungu impilo ephilwa yilo gogo. Okubuhlungu wukuthi nabazukulu bakhe kabanamapasi nezitifiketi. Ngingakujabulela ukuthi noma ngabe ngubani ongaba nosizo ukuba asondele kusizakale umuntu omdala,” kusho uMnu Gwala.
Okhulumela uMnyango wezokuThuthukiswa koMphakathi KwaZulu-Natal, uNkk Ncumisa Ndelu, uthe akanalo ulwazi ngalolu daba.
Ucele ukuthunyelelwa imininingwane ngalo ukuze kuzoqalwa uphenyo. Uzwakalise ukukhathazeka ezwa ngesimo sikaNkz Manzini.