Ligila izimanga iwayini
UKUMINYA ingilazi yewayini ekupheleni kosuku, emuva kokusebenza kanzima kuyasiza ukuba uphumule kahle. Imvamisa uma kukhulunywa ngemisebenzi emihle yewayini kusuke kubhekiswe kwelibomvu (iwayini).
Kunobufakazi besayensi obuthi uma lisetshenziswa ngesilinganiso esifanele iwayini lingakumangalisa ngemiphumela emihle empilweni yakho.
Okusho ukuthi amagama amqoka athi, “ngesilinganiso esifanele” ngokuvamile esingeqi engilazini ngosuku. Nazi-ke ezinye izizathu zokugcwalisa ingilazi yakho ngewayini uzipholele.
UKUPHILA KADE
Ukuphuza iwayini elibomvu kuyaselula isikhathi ngokwenza ngcono impilo bese uphila isikhathi eside.
UKULALA KAHLE
Impela nabesifazane ukuphuza ingilazi yewayini elibomvu emuva kokusebenza kanzima kukwenza uvuke ngakusasa amehlo egqamile. Linesithako esibizwa nge-melatonin esivuselela ukusebenza kahle komzimba.
LEHLISA AMAFUTHA EKUDLENI
Sewake wazibuza ukuthi kungani abesifazane baseFrance benemizimba ebukeka kahle njalo ngisho nangemuva kokudla okunamafutha njengoshizi?
Kungoba iwayini abaye baliphuze liyawaphungula amafutha bese kuvimbeka ukuzimuka ngenxa yalokho kudla.
LIVIMBELA UMKHUHLANE
Iwayini elibomvu lingasiza ekuvimbeni umkhuhlane. Izithako zalo sekutholakele ukuthi ziyawavula amakhala avimbene ngenxa yomkhuhlane, bese kuphefumuleka kalula. ISIKHUMBA ESIHLE
Lezo zithako zalo ezilwa nobuthi obudaleka ngokusebenza komzimba ayasithiba isivinini sokuguga komuntu.
Yingakho nje ezinye izindawo zokuziphophotha nokuzicwala sezinezimonyo zasebusweni ezithakwe ngewayini.
AMAZINYO AQINILE
Iwayini elibomvu linesithako esibizwa nge- polyphenol esisiza ekuqiniseni izinsini sivimbele nokubola ngokuqinisa okuthiwa yi- enamel, okusho ingxenye evele ngaphandle yezinyo lena esiluma sihlafune ngayo. LILWA NOKUGUGA
Iwayini elibomvu liqukethe izithako ezibizwa ngama-antioxidant asiza ekulweni nama free radicals nokuguga ngokuvuselela ingxenye ebizwa nge-collagen esikhumbeni neyenza sinwebeke sibuye sifinyele sibe njengasekuqaleni.
Ukusebenzisa iwayini elibomvu ngaphezulu esikhunjeni kunciphisa imibimbi.
LIVIMBELA ISIHLUNGU
Iwayini elibomvu liqukethe okubizwa nge-AHAs, okuyisithako esivimbela ukubhibha nobuhlungu esikhunjeni. Ukulisebenzisa ebusweni kulwa nezinduna eziba yisidlidli futhi livula izimbobo zesikhumba.
UKULUNGISA ISIKHUMBA
Iwayini elibomvu lingasebenza futhi njenge- toner ukwenza isikhumba sihlale sichachile, sithambile. Cwilisa igengqelana likavolo ewayinini elibomvu bese uligcoba esikhunjeni. Liyeke lihlale imizuzu engama-30 bese uhlambulula ngamanzi.
Cwilisa igenqelana likavolo e...
UKUGEZA IZINWELE
Iningi labantu lithanda izinwele ezinde, ezikhazimulayo njengosilika kodwa ukuzilungisa kuwumsebenzi omkhulu othatha isikhathi. Nansi-ke indlela elula yokwenza izinwele zakho zibe njalo:
Geza ngomuthi osusa inkwethu, ufake leyo mithi yokulungisa izinwele ngokujwayelekile ekugcineni uzihlambulule ngalo iwayini elibomvu. Lokhu kuzokwenza “ikhaba” lezinwele ezinhle ngokushesha.
LIVIMBELA UKUQOTHUKA KWEZINWELE
Yebo, iwayini elibomvu liyasiza ekunqandeni ukuqothuka kwezinwele! Isithako esibizwa nge-resveratrol esiyinsada ewayinini elibomvu, sinciphisa ukulimala nokufa kwama- cell, ngaleyo ndlela kuvimbeleke ukuqothuka kwezinwele kusize ekuzikhuliseni.
UKUGELEZA KWEGAZI NOKUQINISA IZINWELE
Ukuphuza uhhafu wengilazi yewayini elibomvu nsukuzonke kwenyusa ukugeleza kwegazi eliya ekhanda lapho kumile khona izinwele, okusiza ekunciphiseni ukoma nenkwethu kanjalo nokuluma kwekhanda.