Uyalugaxa unyawo ezinsizweni ngengoma
USAWABONGA namanje amagalelo kaKwakhe “Mgqumeni” Khumalo, iBhova likaDikadika (elingasekho) nakuba engathandi ukukuqhakambisa lokho uSphesihle “Fihliskhwele” Magubane (25), ngenxa yomsindo ngezinto ezithinta igama leBhova.
Uthi akathandi ukufaka igama leBhova emculweni wakhe ngoba liyakhulumisa kodwa akasoze alikhohlwa empilweni yakhe ithuba alinikezwe yileli ciko limqeqesha kwezomculo.
Le nsizwa edabuka eSgubudu eNquthu, enyakatho yeKwaZuluNatal, iwuqale isencane kakhulu umculo ngaphansi kwesandla seBhova kwaze kwaba nayo inweba umuzi wakubo emuva kokudlula kwalo emhlabeni. ILANGA lixoxe noFihliskhwele lifuna ukwazi kabanzi ngaye nangomlando wakhe kwezomculo. Le nsizwa iqale izisho kanje: “Fihliskhwele sentombi emfishane, Tshitshi elimhlophe elimise amadolo Phansi kwentab’ enkulu uMqhedlane, Bath’ abantu ayilalanga iguqe ngamadolo. Iziga zabakhwekazi abamthele ngoyaba Losayitsheni kodwa inyama engay idlanga. Nkamba zimdidele emazweni zamqhatha nabakwandlebe zikhanyilanga. Nkeshezela ndoda uyabizwa emoshali eBethal. Umgibe ogaxe izinsizwa eminye igaxe izidwedwe emuva kwezivalo konyokokhulu”. UFihliskhwele uthi leli gama liqhamuke ngokuthi ubenesikhwele kodwa esifihla. Lokhu kwenzeke ngelinye ilanga ngesikhathi efica intombi yakhe ivalelene endlini nomzala wakhe kanti ibabhanqile. Uthi ubefela ngaphakathi engakukhombisi ukuthi uphatheke kabi base bemetha leli gama. “Bekuyintombi enhle emfishane kanti ngike ngayibona nasentabeni eMqhedlane ihleli nomzala ngase ngisola ukuthi kukhona okwenzekayo basebenginika ithemba abangani bami bathi kayilalanga. Kungiphindile lokho kwenye intombi efike endlini yami kanti iyahlolwa, kwafika abazali bayo behamba nabomthetho bagcwala indlu bathi ngilalile nayo ekubeni singenzanga lutho. Ngisindele ukuthi iminyaka yethu beyilingana, ngaleso sikhathi beyili-16,” kusho uFihliskhwele. Uthi esikhathini esiphambili ubezifikela kolubabayo waze waqhatheka nabelungu ngoba uzithole esengena nasezindaweni okungamele atholakale kuzona. Uzichaze njengomculi olugaxayo kakhulu unyawo ezinsizweni ngengoma. Le nsizwa iqale umculo ngonyaka wezi-2006 igidela aBasemzini, okuyiqembu ebelisungulwe nguyise omncane nakuba lingaphumelelanga. Ngonyaka wezi-2008 yahlangana noMthethowakhe “Mkholwane” Langa obesebenza emaqenjini eBhova, oyethule kulesi sihlabani ngoba echazwe wukushaya kwa-yo ingoma eyibone ehostela komunye wemicimbi wengoma ka-shameni. “Kwenzeka lokhu nje, bekuzosungulwa iThwasa Lami (elinye lamaqembu eBhova) kwafika uMthethowakhe ezongicela ukuba ngiyogida, nebala langithanda iBhova ngasebenza nakwamanye amaqembu alo. Kuthe uma lidlula emhlabeni ngase ngicela ukuhosha imfe.
Ngowezi-2011 ngiqophe i- demo yami yezingoma ezimbili nebala ngatholana nenye insizwa eyayiphethe uSandile Mbongwa (ongasekho) igama layo nguMnu Velaphi Mthimkhulu yangifaka esitudiyo yaphuma i-albhamu yokuqala ethi “Ngiphelezele”.
Kusukela lapho kangibange ngisama ngaqhubeka nakuba kunzima. Ngibhekane nezinkinga ngaze ngatholwa nguBoneni Magubane ngowezi-2013 wangifaka ngaphansi kwenkampani yakhe ngaqopha ama-albhamu okubalwa kuwona ethi “Igalelo” nethi “iZizwe”,” kusho uFihliskhwele.
Uthi umculo ubewenza ewubhanqe nesikole kodwa lokho kakumenzanga ukuba asishiye phakathi. Ushonelwe ngabazali, okuyinto emhlukumezile, wabona ukuthi impilo ngeke ibe lula uma engayanga esikoleni.
Utshele ILANGA ukuthi kunesikhathi lapho eshiye phansi isikole ngenxa yokweswela sekushone unina.
Ufunde eNquthu wagcina kwaGrade 4 wabe eselibangisa eGoli wafunda eRamaphanzela Primary School eThokoza.
Uthi ngonyaka wezi-2010 uhlalile ekhaya unyaka wonke engenazo izinto zokuqhubeka nesikole waze wabuyiselwa nguthishanhloko wase- Lethukuthula High School eGoli okuyilapho eqedele khona umatikuletsheni wakhe ngowezi-2013.
“Imfundo ngiyibone ibaluleke kakhulu futhi nasesikoleni babewuthanda umculo wami ngoba benginandisa uma kunemicimbi. Uthishanhloko uthe mangibuyele esikoleni wazithwala zonke izindleko zempilo yami ngaze ngaphothula umatikuletsheni.
“Yingakho ngiqhubekile ngaya esikhungweni semfundo ephakeme ngenza iziqu zeFilm and Tv Production,” kusho uFihliskhwele.
Uthi isigingci usifunde ngonyaka wezi-2010, kumthathe izinyanga eziyisi-6 ukusazi kanti kwi-albhamu yakhe yokuqala ubesezidlalela.
Njengamanje umatasa uzokhipha i-albhamu yesihlanu kuyona le nyanga ngaphansi kwenkampani iMtekhala noShwi Music Entertainment. Kuyona uhambisana noJaiva, Mroza “Van damme” Fakude noShwi.
Akashadelwe kodwa unezingane eziyisihlanu okwamanje.
Uthishanhloko uthe mangibuyele esikoleni...