KUPUTSHUKE UHLU LWABAFUNWA YI-BUCS
KUPUTSHUKE uhlu lwabadlali okuthiwa bafunwa nguDkt Irvin “Iron Duke” Khoza onguSihlalo we-Orlando Pirates ukuqinisa ngabo le kilabhu ngesizini ezayo.
IBucs kayizange ibe nesizini enhle njengoba ibiwukudla kwesibhaxu. Yenze okungafani nayo ishintshashintsha abaqeqeshi okuyinto engavamisile ukwenzeka kule kilabhu.
Ivule isizini ilolongwa nguMuhsin Ertugral waseTurkey osulile ngoLwezi (November) kwabamba okwesikhashana u-Augusto “Njenje” Palacios naye oshiswe yisihlalo ngoNhlolanja (February) njengoba sekuthathe uKjell Jonevret waseSweden osizwa nguHarold “Jazzy Queen” Legodi noBenson Mhlongo.
ILANGA lithole ukuthi umthetho weBucs kawukashintshi, umqeqeshi akaziletheli abadlali kunalokho uyasho ukuthi udinga ukuqiniselwa kuphi bese elandelwa labo badlali.
Leli phephandaba lithole ukuthi uJonevret useshilo ukuthi ufuna isitobha esinesipiliyoni, abadlali basesiswini nomgadli.
Leli phephandaba libe selipotshozelwa ngumthombo walo uhlu lwabadlali okuthiwa uKhoza ubadinga kwiBucs.
Kulolu luhlu kukhona uLimbikani Mzava weLamontville Golden Arrows, uThabo Nthethe ophelelwa yinkontileka kwiMamelodi Sundowns, uJabulani Ncobeni weThanda Royal Zulu okuthiwa useke wabamba izingxoxo neBucs, u-Evans Rusike weMaritzburg United, uJabulani Shongwe ophelelwa yinkontileka kwiBidvest Wits, uBen Motswari weWits noThobani Mncwango wePolokwane City okuthiwa useyisayinile inkontileka yesethembiso kwiBucs.
“UKhoza uphoxeke kabi njengoba ikilabhu ishaye udaka ekubeni igubha iminyaka engama-80 yasungulwa.
“Njengoba ngikhuluma nje, lolu luhlu lukuyena uzibambele mathupha ufuna ukuqinisa ikilabhu ukuze ingabi yinhlekisa njengoba kwenzeke ngale sizini. Usebambe umoya ukugqiba ihlazo ngeNedbank Cup kwazise yiyona esiyithemba lakhe,” kusho lo mthombo.
Imizamo yokuthola uKhoza iphunzile njengoba ucingo lwakhe belukhala kodwa lungabanjwa. Lo mthombo uthe ngeke kube lula ukumthola kwazise iBucs ibigijima umdlalo omkhulu neMamelodi Sundowns izolo ngeSonto ntambama e-Orlando Stadium, eSoweto. Uthi akaphazanyiswa uma kudlala imidlalo emikhulu ngalolu hlobo.